Антимонополия "счетчик иши"ни очадими? Рақобат қўмитаси электр қувватини ортиқча ҳисоблаётганлиги ва бу қўшимча харажатларга сабаб бўлаётганлиги юзасидан истеъмолчилар томонидан мурожаатларини ўргана бошлагани ва ўрганишлар давомида аниқланадиган камчиликларни бартараф этиш бўйича қонуний чоралар кўрилишини эълон қилди. Ҳамма гап шундаки, электрдан фойдаланишда ҳисоб-китоблардаги ноаниқликлар ҳамиша бўлган. Лекин истеъмолчилар бу ҳолатга тарифларнинг кескин ошиб, чўнтакка таъсири яққол сезила бошлагачгина эътибор қаратишган. Рақобат қўмитаси ўрганишлар давомида ишни қандай счетчиклар ўрнатилганидан бошласалар, муаммонинг туб-негизини белгилаб олган бўлардилар. Чунки биринчидан, айнан пул ўзлаштириш учун каррасига қимматлаштирилган, икки-уч карра қайта ўрнатилган счетчиклар, иккинчидан, ақлли дейилган бўлсада, ақлли бўлмаган счетчиклар, учинчидан, ҳисоб-китоблардаги ўртачалаш алгоритмлари истеъмолчининг зиёнига эканини текширишгина муаммони ечишга калит бўлиб хизмат қилади. Акс ҳолда, истеъмолчилар тоғдан келса, шонли энергетиклар ўзига қулай боғдан гапириб сувдан қуруқ чиқаверишади. Мазкур масала ўтган йили Давлат раҳбарининг шахсан ўзи томонидан кўтарилгани бежиз эмас. Мустақил органлар, айни ҳолатда Антимонополия АСКУЭ тизими сервери ва ақлли дейилган счетчиклар ўртасида барқарор алоқа борми, бўлса, маълумот алмашиниш соатбайми, кунбайми, ойбайми ёки қўлбайми аниқлашлари керак. Бу ақлли дейилган счетчиклар техник имкониятлари ўзи талаб қилинадиган ва эртага эркин бозорга ўтганимиздаям ишлайдиган даражадами ё ошқовоққа айланиб қоладими?