Бюджет тақчиллигига қарамай, Иқтисодиёт ва молия вазирлиги Микрокредитбанкнинг 250 млрд.сўмлик акциясини бозор нархидан қиммат котировкада сотиб олган Октябрь ойи якунларига кўра, "пул ёқар" давлат банклардан бирининг устав капитали 250 млрд.сўмга ошиб қолгани дарров эътиборни қаратмаслиги мумкин эмас. Очиқ манбаларга кўра, Микрокредитбанк акциядорлари 2023 йил 15 сентябрь куни 250 млрд.сўмлик қўшимча акциялар чиқариш ва акцияларни ёпиқ обуна билан Иқтисодиёт ва молия вазирлигига жойлаштириш тўғрисида қарор қабул қилишган. Акциялар нархи номинал қийматда 1068 сўм этиб белгиланган. Худди шу куни биржадаги савдоларда Микрокредитбанк акциялари 955 сўмдан сотилган. 2023 йил 25 октябрда Иқтисодиёт ва молия вазирлиги Микрокредитбанкнинг 250 млрд.сўмлик акцияларини ҳар бир акция учун 1068 сўм котировкада сотиб олган. Худди шу куни биржада Микрокредитбанк акциялари 952 сўмдан сотилган. Бу ҳали ҳамма эмас, одатда нормал банклар акцияларини йирик инвестор нормал келишувлар орқали сотиб олгач, акцияларнинг бозор қиймати ошиб боради, лекин Иқтисодиёт ва молия вазирлиги Микрокредитбанкнинг акцияларини 1068 сўмдан сотиб олгач, акциялар нархи 828 сўмгача арзонлаб кетган. Бошқача айтганда, Иқтисодиёт ва молия вазирлиги бир ой аввал 250 млрд.сўмга сотиб олган акцияларнинг бугунги нархи 194 млрд.сўмдан ошмайди. Албатта рентабеллиги 0,7%дан ошмайдиган, амалда зиён кўриб ишлаётган банк капиталига пул киритиш, киритгандаям ўта оғир бюджет тақчиллиги шароитида пул киритиш ҳеч қандай иқтисодий маънога эга эмас. Нормал давлатда бундай битим учун парламент ҳукуматни бутун таркиби билан гиламга чақирган бўларди. Нормал давлатда ягона функцияси пул ёқишдан ва пруденциал талабларни намойишкорона бузиб келишдан иборат бўлган бундай зараркунанда банк лицензияси Марказий банк томонидан тортиб олинган бўларди. Хўш, унда нега бу схема ҳукуматнинг ёпиқ кабинетларида туғилди? Мутлақо шахсий фикримча, мазкур битимдан ягона мақсад Микрокредитбанк учун Алоқабанкнинг пойтахт марказидаги биноларини сотиб олиш учун пул топиб бериш бўлган. Эсингизда бўлса, "қандоқ қилиб, ўзи ҳатто тўловларни молиялаштиришга пули йўқ банкка бир неча юз миллардга бино олишга рухсат берилган, ким молиялаштиради бу битимни" дея савол қўйган эдик. Илгари "искандарнинг шохи" ҳақидаги сирлар очилиб кетиши учун 40 йил керак бўларди, ҳозир 40 кунгаям бормаяпти.