Бўлади-ку мана очиқласа! Бухоро ва Хоразмда қуриладиган қуёш электр станцияларига оид тегишли қарорлар эълон қилинди. Унга кўра: Бухорода қуввати 250 МВт бўлган қуёш электр станцияси ва 63 МВтлик электр энергиясини сақлаш тизимини амирликларнинг Masdar компанияси қуради. Хусусий шерикнинг киритадиган инвестициялари қиймати 273 млн.доллар. 1 киловатт.соат электр энергияси учун 3,044 цент, 1 мегаватт.соат электр энергиясини сақлаш учун 16,55563 долларлик тариф ўрнатилган. Хоразмда қуввати 100 Мвт бўлган қуёш электр станциясини Франциянинг Voltalia компанияси қуради. Баҳоланган инвестиция қиймати 68 млн.доллар. 1 киловатт.соат электр энергияси учун 2,888 центлик тариф ўрнатилган. Ҳар икки станцияда ишлаб чиқарилган электр энергияси 25 йил давомида кафолатли сотиб олинади. Мазкур лойиҳалар ва Наманганда қуриладиган яна бир қуёш станцияси бўйича тендер ўтган йили эълон қилинган эди. Унда 11та компания иштирок этиши айтилган. Бошқа даъвогарларнинг тендер учун таклиф қийматлари тўғрисида маълумот очиқланмаган. Ўзбекистонда тендерсиз амалга оширилаётган қуёш ва шамол станциялари қуриш бўйича ўнлаб гигант лойиҳаларда электр энергиясининг кафолатли сотиб олиниши ва электр энергиясини сақлаш тизимидан фойдаланганлик учун тўловлар нархи ёпиқлигича қолмоқда.