​Қуёш станцияларидан 4,828 центдан электр. Бу жуда қиммат Наманганда қуввати 150 MВт бўлган қуёш станцияси қуриш бўйича Хитойнинг “GD Power – Powerchina” ҳар бир киловатт-соат электрни 4,828 центдан (ёки бугунги нархларда 543 сўм) етказиб бериш таклифи ғолиб бўлган. Афсуски, бошқа йирик талбагор Abu Dhabi Future Energy Company– Masdar ушбу лотда таклиф киритмаган. Туркиянинг Alarko Holding AS эса, ютиш нияти бўлмаган шекилли, 6,08 центлик таклиф берган. Alarko Holding AS'нинг бошқа Хоразмдаги станцияни қуриш лоти бўйича ҳам таклифи (5,188 цент) иқтисодий мантиқдан узоқ. Хоразмдаги 100 MВт бўлган қуёш станцияси қуриш бўйича Франциянинг “Voltalia” компанияси ҳар бир киловатт-соат электрни 2,888 центдан етказиш таклифи билан ғолиб бўлган. Бухородаги 250 MВт бўлган қуёш станцияси қуриш бўйича БААнинг “Abu Dhabi Future Energy Company– Masdar” ҳар бир киловатт-соат электрни 3,044 центдан етказиш таклифи билан ғолиб бўлган. Айтиш керакки, кеча эълон қилинган тендер натижалари аввалгилари билан солиштирилса, ғолибларнинг таклифлари сезиларлича қимматлаган. Солиштириш учун, ўтган йилларда Abu Dhabi Future Energy Company– Masdar Хоразм, Самарқанд ва Жиззахдаги станциялар бўйича 2,68 центдан таклиф бериб ғолиб бўлган. Худди шу консорциум Шерободдаги қуёш станцияни эгаллаш учун 1,80 центлик таклиф бериб ютиб чиққан. Кўриб турибсизки, янги лойиҳалар бўйича нархлар росмана қимматлаган. Бунга тендер шакли ва дизайни ҳам таъсир кўрсатган кўринади. Чунки биринчи марта 3та станция қуриш бўйича 3та лот тендери бир вақтда олиб борилди. Бу унча тўғри бўлмаган тактика, чунки қуёш станцияси қуриш бўйича бусиз ҳам Ўзбекистонда 3-4 компания ишлаяпти холос. Улар бир-бирига рақобат қилмаслиги учуну биттадан лотни белгилаб олган бўлишлари эҳтимоли ҳам йўқ эмас. Намангандаги станция водийдаги биринчи қуёш станцияси бўлади, энергия таъминотидаги энг катта дисбалансга эга ҳудудда починни бундай бошламаслик керак. Хитой компаниялари билан айниқса (ўзи умуман миллий хавфсизлик учун таҳдид яратадиган Хитой компанияларини водийга яқинлаштирмаслик стратегиясини ҳам ишлаб чиқиш керак бўлади). P.S. Энергетика вазирлиги ҳам Намангандаги қуёш станцияси бўйича лот ғолиби бўлган Хитой компанияси таклифини қиммат деб ҳисобламоқда. https://t.me/minenergy_uz/6713 @the_bakiroo