Очиқликдан ҳамма ютади. Фақат коррупционерлар ютқазади Энергетика вазирлиги Намангандаги қуёш станцияси бўйича тендер якунларига тезкор муносабат билдириб, 4, 828 центлик таклифни қиммат деб ҳисоблашини ва натижалар қайта кўриб чиқилишини маълум қилди. Бунинг учун раҳмат. Агар кеча эълон қилинган тендер натижалари эълон қилинмаганида ва аввалги худди шундай лойиҳалар бўйича таклиф нархларини билмаганимизда, бу рўй берган бўлармиди? Йўқ, албатта йўқ. Ёпиқлик қозон ёпиқлигича қолаверарди. Деярли икки баробар қиммат нархда бир неча ўн йил электр сотиб олишга тўғри келарди. Бундан биз, ҳаммамиз, давлат ҳам, истеъмолчилар ҳам ютқазардик. Шунинг учун очиқлик керак. Жудаям керак. Биз ҳалича "Иссиқлик электр станциялари" АЖ таркибидаги ИЭСлар ишлаб чиқараётган электр таннархи ва бу электр қанчадан сотиб олинаётганини билмаймиз. Биз ҳаличага кўмир, яна қимматлаштирилган импорт кўмир ҳам ёқиб, электр генерация қилинадиган "Ангрен" ва "Янги Ангрен" ИЭСларида ишлаб чиқариш таннархи ва сотиб олиш нархларини билмаймиз. ИЭСлар қанақа шартларда олигархларга ишончли бошқарувга топширилганидан ҳам бехабармиз. Биз ҳалигача, “Ўзбекгидроэнерго” АЖ таркибидаги ГЭСлардаги генерация таннархини билишдан маҳруммиз. Нега ГЭСлар энергияси табиатан энг арзон бўла туриб, энг қиммат нархларда сотиб олинаётгани бўйича саволлар эса ҳалигача жавобсиз қолмоқда. Биз ҳалигача асосан турк ва сауд компаниялари (Aksa Enerji, Cengiz Enerji, Odas Enerji, Acwa Power) билан газ-буғ поршенли янгича технологияга асосланган станциялардан электр неча йил муддатга ва қанақа нархларда кафолатли сотиб олиш келишувлари шартларидан бехабармиз. Ёпиқлик, махфийлик, чала маълумот бериш бу якунда энергетика бозорини ташкил этишга томон ислоҳотларга ҳам тўсиқ бўлади. Чунки ҳар қандай истеъмолчи, э тўхта, нега бир киловатт.соат электр учун 650 сўм тўлашим керак, бу ерда таннарх қанақа, маржа қанақа, бу ерда транспорт харажати қаанақа деган саволга тайинли жавоб олиш учун маълумотнинг ўзи йўқ. Қайсидир биттаси чиқади, электр ўртача таннархи 400 сўм дейди, яна биттаси чиқади мазутдан олинадиган электр таннархи 1050 сўм дейди. Бундай ёндашувлар жамиятни янада қутблаштиради, вазиятни эса лойқалаштиради. Демак, бизга очиқ бозор керак дейилаяптими, бу биринчи навбатда очиқ маълумотлар дегани. Барча учун. @the_bakiroo