Тез пул топиш бўйича йўриқномалар нафақат Ўзбекистонда, балки бутун дунёда урчиб кетди. Йўллар турфа: криптобиржада олиб-сотарлик қилишдан бошлаб турли бир мартали “схемалар”: бу ерда 5 тийинга сотиб олиб, таниш-билишни ишга солган ҳолда 25 тийинга ўтказиш. Шунақа ачинарли тенденциялар кузатилиб турганда видеодаги сингари қаҳрамонларнинг тажрибасини ростанам тарғиб қилиш керак деган хулосага келдим. Чунки уларнинг ҳаракатида ҳамма нарсага ўз меҳнати билан эришгани кўриниб туради. Масалан, Алексей Маншаевни юртимизнинг энг намунали тадбиркорларидан бири сифатида эътироф этсак бўлади. У мураккаб ҳаёт йўлидан юриб, мардикорликдан чарм саноати соҳасига кириб борган. У яратган Kanishka бренди чет элдаям машҳур. Бизга сифатли пропаганда керак. Шунақа яхши мисолларни ёшларга намуна қилиб кўрсатишимиз керакки, улар осон ва қинғир йўллар билан эмас, ҳалол меҳнат билан пул топиш ва бойишни ўйлашсин. Савдо-саноат палатаси янада кўпроқ қаҳрамонларни ТВга олиб чиқиб машҳур қилаверсин.