"Экспертизага киритилган вариантда маиший техникалар импортида ишлаб чиқарувчининг расмий дилери бўлиши талаб қилинадиган маҳсулотлар рўйхати бўлмаган" Кун.ўз Картель рўйхати бўйича Адлия вазирлиги ва Рақобат қўмитасидан электротехника ишлаб чиқарувчиларни қўллаш бўйича эълон қилинган навбатдаги чораларга муносабатини олган. Адлия вазирлиги муносабатидан: "Вазирликка киритилган вариантда Ўзбекистон Республикаси ҳудудига олиб киришда уларнинг сифати, хавфсизлиги ҳамда сервис кафолатини таъминлайдиган ишлаб чиқарувчининг ваколатли вакили ёки расмий дилерлари мавжуд бўлиши талаб қилинадиган маҳсулотлар рўйхати (қарорнинг 3-иловаси) мавжуд бўлмаган". Муҳокама этилаётганида йўқ бўлган зарарли нормаларнинг имзога киритишда қўшиб юборилиши янги Ўзбекистон учун одатга айланиб бўлди. Аввалги раҳбарлари монополия ва олигархияга қарши сўз айтиб қўйиб, боши кетиб қолгандан кейин ҳозиргача раҳбарсиз турган Рақобат қўмитаси эса қарорда рақобатга зид ҳолатлар йўқлигини маълум қилган. Лекин, Рақобат қўмитаси, билибми, билмайми, Картелнинг қанчалик очофатли аждарҳо эканини очиб қўйган. Шартли Картель лойиҳасида "тайёр электротехника маҳсулотлари Ўзбекистон Республикаси ҳудудига олиб кирилишида импорт қилинадиган маҳсулот қийматининг 1 фоизи миқдорида амалдаги импорт божларига қўшимча равишда йиғим ундирилишини назарда тутувчи норма" бўлган.