Картель учун валюта курсидан йўқотишларни ҳам қоплаб беришмоқчи Картель аллақачон аждарҳога айланиб бўлган, унинг иштаҳаси фақат кенгайиб боради. Ўзбекистонликларни талаш орқали бойлик орттиришни бизнес моделига айлантирган Картель нафақат эски имтиёзларни сақлаб қолишни ва 2027 йилгача узайтиришни, янги ва янги имтиёзларни истамоқда. Демак, Картель учун экспортда валюта курсини хедж қилиш хизматларидан фойдаланиш харажатларини қоплаб бериш таклифи илгари сурилган. Бу содда тилда айтганда, рублда ё тенге курси ошиб кетса, Картелнинг Россия ва Қозоғистонга экспортидаги йўқотишларини биз, солиқ тўловчилар қоплаб берамиз дегани. Шунингдек, Картель учун хом ашёни импорт қилишда транспорт харажатларини компенсациялаш режа қилинмоқда (ҳозиргача фақат экспортдаги транспорт харажатлари қоплаб бериларди). Бу ҳали ҳаммаси эмас. Картелнинг иштаҳасига кўра яна: электротехника маҳсулотлари ишлаб чиқарувчи маҳаллий корхоналарнинг маркетинг тадқиқотлари ва рекламага доир харажатларни фойда солиғи бўйича солиқ солинадиган базадан 2 коэффициент қўлланилган ҳолда чегириш; йирик аудитор ва рейтинг агентликларини соҳада маркетинг ва аудиторлик ўрганишлар олиб бориш билан боғлиқ ҳаражатларни қоплаш; электротехника тармоғи корхоналари, жумладан, сервис хизмати кўрсатиш корхоналари ўз хизматларини бозор нархларидан паст қийматда амалга оширган тақдирда, истисно тариқасида солиқ оқибатларига олиб келмаслик; электротехника маҳсулотлари ишлаб чиқарувчиларига солиқ ва божхона ҚҚСларини кечиктириб тўлашда уларга ҳисобланадиган Марказий банкнинг қайта молиялаштириш ставкасидаги фоизларни қўлламаган ҳолда тўлаш муддатларини 180 кунгача кечиктириб тўлаш механизмини жорий этиш ҳам мўлжалланмоқда. Хўш, товони ва тўлови ўзбекистонликлар чўнтагидан юлиб олинадиган бу имтиёзларга йўқ дея олиш, тўхтатиб қолиш мумкинми? Қийин иш. Чунки: Ўша Картель билан тил бириктираётган чиновникларни гиламга чақириб, сўроққа тутадиган парламент йўқ. Антимонополия органи соқов. Коррупцияга қарши кураш агентлиги экспертиза ўтказишни истамайди. Ва бу кетишда тез орада Картель ҳақида ёзиш мумкин бўлмай қолади.