​Бензин арзонламоқда Йўқ, қуёш қаёқдан чиқди деб, хурсанд бўлиб кетманг, Арзонлаётган бензин Ўзбекистонда эмас. Қирғизистонда. Шонли энергетикларимиз бензин нархи ҳақида гап кетиб очофат монополистларимизнинг нархлари ва қўшни Қозоғистондаги нархлар солиштирилса, шаблон жавоби доим тайин. Яъни, қозоқларда нефть бу "деҳқончилик" экани, қардошлар Ўзбекистондан кўра деярли 120 баробар кўп нефть (90 млн.тонна) қазиб олиши айтилади. Лекин, шундоқ ёнгинамиздаги Қирғизистонда ўзининг нефти етишмаслиги билан боғлиқ муаммо худди Ўзбекистондаги каби. Қирғиз қардошлар йилига ўртача 280 минг тонна нефть қазиб олади. 1,5 млн.тоннагача нефть ва нефть маҳсулотлари импорт қилинади. Табиийки, нега унда Қирғизистонда бензин Ўзбекистондан арзон деган савол туғилади. Жавоб жуда оддий: Очофат монополист ишлаб чиқарувчилар ва бир қўлли чўнтак олигарх импортчилардан фарқли ўлароқ Қирғизистонда соғлом бозор бор, ўзаро рақобатлашувчи ишлаб чиқарувчилар ва импортчилар истеъмолчилар танлови учун тинимсиз курашади (5та турли нефтни қайта ишлаш заводи ва 50га яқин импортчилар). Буни қўшнилардаги бензин нархлари динамикасидан ҳам кўришингиз мумкин. Январь ойи давомида 95 маркали бензин 71,39 сом (9 947 сўм)дан 70,09 сомгача (9 765 сўм) арзонлашган. Ўзбекистонда 95 бензин 13 900 сўмдан 16 500 сўмгача. 92 маркали бензин қирғиз қардошларимизда 63,74 сомдан (8 882 сўм) 62,59 сомгача (8 720 сўм) арзонлаган. Ўзбекистонда 92 бензин 10 500 сўмдан 12 500 сўмгача. Дизель ёқилғиси нархлари 4 млрд.долларгача шиширилган GTL заводи йўқ қирғизларда 71.49 сомдан (9 960 сўм) 70,93 сомгача (9 883 сўм) пасайган. Ўзбекистонда 10 500 сўмдан 15 000 сўмгача. 2024 йилнинг январь ойида бир хил шароитдаги ва жўғрофик жойлашувдаги Қирғизистонда бензин 2,2%гача арзонлаган бўлса, Ўзбекистонда бензин 6,4%гача қимматлаган. Энди очофат монополистлар ва муттаҳам олигархлар назорати билан эркин бозор фарқини тушунгандирсиз? Қиммат бензин ва таланаётган истеъмолчилар учун ким айбдор ва жавобгар эканини-чи?