​Оилавий тадбиркорликка ажратилган кредитлар сони ортишда давом этмоқда, лекин суммаси қисқара бошлаган 2023 йилда оилавий тадбиркорлик учун жами 9 864,3 млрд.сўмлик кредит ажратилган, бу 2022 йил кўрсаткичидан 29,1 млрд.сўмга кам. Хусусан, "Ҳар бир оила - тадбиркор" дастури асосида 9 259,8 млрд.сўмлик кредитлар молиялаштирилган (2022 йилдагидан 120,2 млрд.сўм камроқ). Ажратилган кредитлар суммада қисқаргани билан, кредит олганлар сони ортишда давом этмоқда. 2023 йилда жами 472 021 нафар фуқаро кредит олган, бу 2022 йилдагидан 47 483 нафар кўпроқ дегани. Табиийки, оилавий тадбиркорлик учун ажратилаётган кредитларнинг ўртача миқдори ҳам камайиб бормоқда. 2023 йилда битта имтиёзли кредитнинг ўртача суммаси 20,9 млн.сўмни ташкил этган. 2022 йилда кредитларнинг ўртача миқдори 23,3 млн.сўм бўлган. Оилавий тадбиркорликни ривожлантириш дастурлари доирасида кредитлар 2024 йил 1 январдан бошлаб 3 йилгача муддатга 6 ойлик имтиёзли давр билан йиллик Марказий банкнинг асосий ставкасидан 4 фоизлик пункт юқори ставкада ажратилиши белгиланган (18%). Лекин бу талабларга амалда яна риоя қилинмаётган ва кредитлар эскича 14%лик имтиёзли ставкада молиялаштирилаётган кўринади.