Олтин-валюта захиралари иккинчи ой кетма-кет эълон қилинмади Халқаро захираларимиз ва уларнинг таркибий динамикасини акс эттирувчи февраль ойи якуни бўйича ҳисобот мартнинг 10- санасига келиб ҳам очиқланмади. Бу кетма-кет иккинчи узилиш. Январь ойи якунлари бўйича ҳисобот ҳам эълон қилинмаганди. Маълумотларнинг яширишга ўтилиши ташқи савдо балансининг ёмонлашуви, пул ўтказмаларининг қисқариши тенденцияси фонида, ҳатто олтин нархларининг янги рекордларгача кўтарилишига қарамай, халқаро захираларнинг қисқариши тўхтамаётгани билан боғлиқ бўлиши мумкин. Марказий банк ҳеч қурса коммуникация воситаси ўлароқ нима учун захираларни очиқлашни тўхтатганини ҳам изоҳламай келмоқда. Айтайлик, 2023 йил августи якунлари бўйича банк тизими фаолиятининг асосий кўрсаткичларининг эълон қилинмагани ахборот базаси маълумотларини таҳлил қилиш ва умумлаштириш мақсадида ўрнатилган бизнес-таҳлил тизими (BI) асосида йиғма маълумотларнинг автоматик равишда шакллантириш билан тушунтирилганди. Марказий банк асосий ставкасини кўриб чиқиш бўйича навбатдаги йиғилиш 14 мартга белгиланган. Балки шу йиғилиш баҳона ўтадиган анжуманда жамоатчиликка қандайдир ишора берилар.