Пойтахт банк Инвесторининг охирги бенефициари ким? Давактив, “Пойтахт банк” АЖ устав капиталидаги 100 фоиз акциялар пакетини Бирлашган Араб Амирликларининг “Bond Investments limited LLC” компаниясига 10,0 млн. АҚШ доллари миқдордаги сотиб олиш тўловини бирйўла амалга ошириш шарти билан сотиш бўйича келишувга эришилганлигини маълум қилмоқда. Давактивга кўра, Инвестор Бирлашган Араб Амирликларининг инвестиция компанияларидан бири бўлиб, “Das Holding LLC” компанияси гуруҳи таркибида фаолият юритади. Очиқ манбалар орқали Инвесторнинг якуний бенефициарини аниқлаш имконсиз. Балки инвесторларнинг асл бенефициарларини Марказий банк томонидан “Пойтахт банк” АЖ акцияларини сотиб олишга доир дастлабки рухсатнома беришдан олдин очиқланар. “Пойтахт банк” АЖ энг кичик давлат банки, янги даврда Тошкент шаҳар ҳокимлиги таъсисчилигида ўз фаолиятини бошлаган. Жами капитали 164 млрд.сўм атрофида (шундан устав капитали 100 млрд.сўм), кредит портфели нисбатан тоза, соф фойда билан ишлаётган банк. Инвестор Марказий банк чиғириғидан муваффақиятли ўтса, 2025 йил 1 январгача банк устав капиталини 500 млрд.сўмгача ошириши керак бўлади.