Қанақадир дежавю Қанақадир 15 йиллар олдин ўзини нолдан максимумгача деб эълон қилган, мамлакатдаги барча саройлар қурилиши, энг йирик пудратлар ва конларгача чангалига солган трейдер компания аввалига ойига миллион доллар ойлик оладиган футболчи ва мураббийларига, кейин минг доллар оладиган қурувчи ва инженерларга ва охирида 100 долларлик маошга ишловчи оддий ишчиларга ҳам ойлик бера олмай қолганди, кейин тўсатдан душман овозлар нолдан максимугача бўлган компания банкрот бўлгани ҳақида ёза бошлашди. Ундан кейин нима бўлгани кўпчиликнинг ёдида бўлса керак. Янги даврнинг пудрат ва энергетика қиролига айланган гуруҳнинг ўзбекистонликлардан тортиб, Ўзбекистонга солиқ тўламай ишлатилаётган хорижликларгача ойлаб маош тўлай олмай қолгани ҳақидаги хабарлар биринчи марта пайдо бўлиши эмас. Гуруҳнинг пул оладиган асосий ва бош канали Ўзбекистон бюджети ва давлат компаниялари экани ҳисобга олинса, ойлик бера олмаслик муаммоси айсбергнинг учи холос. Гуруҳнинг молиявий қийинчиликлари фақат қарз юки ошиб кетгани билан эмас, қанчалик ғалати эшитилмасин, Ўзбекистоннинг чекланган иқтисодий имкониятлари тобора тугаб битаётгани, каррасига шиширилган ва самарасиз лойиҳалар билан ишлаш моделини давом эттириш энди имконсизлиги билан боғлиқ. Вазиятдан чиқиш учун яна битта бир неча 10 млрд.лик лойиҳа ўйлаб топиш ёки борини янада қимматлаштириш энди мамлакатнинг тўлов қобилиятини сўроқ остига қолдиради. Шунинг учун, энг тўғри йўл, аввалбошдан иқтисодий самарасизлиги аниқ бўлган лойиҳаларнинг молиялаштирилишини бирин кетин тўхтатиш, ишга тушганларини сарҳисоб қилиш, янгиларини бошламаслик бўлса керак.