Ипотека кредитларининг ўсиши яна секинлашган Май ойида тижорат банклари ипотека кредитлари қолдиғи 432 млрд.сўмга ўсган (бундан камроқ ойлик ўсиш 2023 йил аномал январида кузатилган). Солиштириш учун, ўтган йилнинг май ойида банкларнинг ипотека портфели 918 млрд.сўмга ўсган эди. Негизини автокредитлар ташкил этувчи истеъмол кредитларининг ўсиши 168 млрд.сўмни ташкил этган, ўтган йилнинг шу даврида қарийб 20 баробар кўпроқ, 3,1 трлн.сўмлик ўсиш қайд этилган эди. Банкларнинг жами кредит қўйилмалари ой давомида 6,7 трлн.сўмга ўсган ва 490,3 трлн.сўмга етган. Ойлик ўсишнинг 2,5 трлн.сўми чакана, 4,2 трлн.сўми корпоратив кредитларга тўғри келган (давлат банкларининг фаоллиги ҳисобига). Давлат банкларининг кредит портфели 4,3 трлн.сўмга, хусусий банкларники 2,4 трлн.сўм ўсган. Давлат банкларидаги кредит фаоллиги билан бир вақтда муаммоли кредитларнинг сезиларли камайиши ҳам қайд этилган. Миллий банк (-539 млрд.сўм), ЎзСҚБ (-371 млрд.сўм, БРБ (-301 млрд.сўм) муаммоли кредитларни сўндиришда фаол бўлишган. Улушда энг катта муаммоли кредитларга эга бўлган Октобанк балки захиралар ҳисобидан NPL қолдиғини тўлиқ ноллаштирган. Жами муаммоли кредитлар қолдиғи 2,4 трлн.сўмга, 20,9 трлн.сўмгача қисқарган (NPL улуши 4,8%дан 4,3%гача тушган).