"Олаверинглар, давлатимиз камайиб қолмайди": Яна учта ИЭС яширин қарор билан ишончли бошқарувга берилган Ичкариси ўзбекистонликлар учун тақа-тақ ёпиқ Ўзбекистон энергетикасида ғалати ишлар давом этмоқда. Ишончли манбаларнинг маълум қилишича, яна учта иссиқлик электр станцияси ёпиқ қарор билан "хусусий қўлларга" ишончли бошқарувга бериб юборилган ва шу сабабли Иссиқлик электр станциялари АЖ таркибидан чиқарилган. Булар Тахиатош, Тошкент ва Навоий иссиқлик станциялари. Ҳар уч станция шонли энергетикларга бегона бўлмаган битта қўлга топширилган. Ишончли бошқарувга топшириш бўйича на бирон конкурс ва на бирон рақобатли танлов ўтказилган. Ўзбекистонда, янги дейилган даврда ишончли бошқарувга топширилган биронта активнинг аҳволи яхшиланмаган, қайтанга уларнинг зарари ошган, самарадорлик пасайган. Маълумотлар ёпиқ. Ҳисобдорлик йўқ. Ишончли бошқарув ёрлиғи остида активларни қўлга киритган ўғри олигархлар қимматлаштирилган битимлар билан активнинг қолган-қутган ресурсларини талаш билан машғул бўлишади. Эсингизда бўлса, ишончли бошқарувга берилган Ангрендаги ИЭСларнинг дабдаласи чиқарилгач, бир муддат яна давлат назоратига қайтарилган эди. Энди шўрпешона истеъмолчилар таннархни шиширувчи самарасиз чиновникларни эмас, чиновниклар билан чўнтаги чатишиб кетган ўғри олигархияни боқишга маҳкум қилинадиган кўринади.