​Тахиатош ИЭС бошқаруви давлатга қайтарилади Кеча эълон қилинган қарорнинг эътиборга сазовор бандларидан бири Smart Integrity me МЧЖга ишончли бошқарувга бериб юборилган Тахиатош ИЭСнинг яна Иссиқлик электр станциялари АЖ, давлат назоратига қайтарилиши билан боғлиқ. Маълумот учун, Smart Integrity me МЧЖга Давактив томонидан бир эмас, нақ учта иссиқлик электр станцияси - Тошкент, Навоий ва Тахиатош ИЭСлар яширин қарор билан “ишончли бошқарувга” бериб юборилган. Бу ҳақда биронта расмий маълумот шу пайтгача эълон қилинмаган эди. Smart Integrity me МЧЖ таъсисчиларидан бири New Industrial Technologies МЧЖ ҳисобланади. Мазкур компания Paynet тўлов ташкилоти, Humo тўлов тизими ва Деҳқонобод Калий заводини “хусусийлаштириб” олган тузилмаларнинг бевосита ёки билвосита бенефициарларидан (қизиқ тарафи, Smart Integrity me ва New Industrial Technoligies МЧЖлар тўғрисидаги маълумотлар Статқўм регистридан ҳам, iHamkor базасидан ҳам чиқмайдиган қилиб қўйилган). Тахиатош ИЭС яширин қарор билан ишончли бошқарувга бериб юборилгандан бери бирон марта молиявий ҳисоботларини очмаган (ягона корпоратив платформада қуруқ титул жойлаштириб келинади, жазо ё назорат йўқми, шунақа кўзбўямачилик қилсаям бўлса керак). Станция ишончли бошқарувга берилишидан олдинги ҳисоботига кўра, фойда билан ишлаган, кейин зарарга кирганми ё йўқ, номаълум. Ўзбекистонда фойда билан ишлаб турган ИЭСларни турли корчалон контораларга ишончли бошқарувга бериш ва коппор зарарга киритилиб, харажат ва таннарх шиширилиб, барқарор фаолияти издан чиққач яна давлатга қайтарилиши аввал Янги Ангрен ва Ангрен ИЭСлар билан рўй берганди.