Миллий банк еврооблигациялар орқали олинган қарз нархини нега очиқламади? Ўтган ойнинг охирида Миллий банк Лондон фонд биржасида жами 411 млн.долларлик, шундан 5 йиллик 300 млн.доллар ва 3 йиллик 1,4 трлн.сўмлик еврооблигацияларни жойлаштирганини эълон қилди. Банк мазкур жойлаштирувда ставкаларни очиқлагани йўқ. Кейинроқ Миллий банк кўплаб ОАВларда жойлаштирган реклама ҳуқуқидаги пиар материалларда ҳам облигацияларнинг ставкаси тўғрисида бирон бир ахборот берилгани йўқ. Одатда қайсидир ўзбек эмитенти хорижий платформалардан облигациялар кўринишида қарз жалб қилса, маълумот берадиган Иқтисодиёт ва молия вазирлиги бу сафар сукут сақлади. Бу ҳолат Ўзбекистоннинг энг катта банки томонидан кредиторларга нисбатан ҳам, омонатчиларга нисбатан ҳам холис ёндашув эмас. Банк мижозларидан тортиб, Ўзбекистоннинг бутун жамоатчилиги давлат назоратидаги энг йирик давлат банки қанақа нархда қарз олаётганини билишга ҳақли. Чунки бевосита ёки билвосита ушбу қарзларнинг якуний юки ўзбекистонликлар зиммасига тушади (айниқса иқтисодий самарасиз лойиҳалар молиялаштирилганида). Демак, Миллий банк: 300 млн.долларлик облигацияларни 8,5%дан; 1,4 трлн.сўмлик облигацияларни эса 19,875%дан жойлаштирган. Қиммат олинган қарзлар нархининг очиқламаслик сабаби тепадагиларни чўчитмаслик учунми ё ўзбекистонликлардан уялганишганиданми? Солиштириш учун, 1 июнь ҳолатига Ўзбекистон банкларида муддати 1 йилдан юқори валютадаги корпоратив депозитларнинг ўртача нархи 7,2%ни, сўмда эса 15.2%ни ташкил этган. Катта эҳтимол, Миллий банк олинган қарзларни маржиналлиги юқори бўлмаган маъмурий лойиҳаларга йўналтиради, сал аввалроқ банк 2024 йилда 2,5 млн.ишчи ўрни яратиши тўғрисида презентацияларни амалга оширган эди.