​Шонли энергетиклар субсидияхўрликда мутлақ етакчи 2024 йилнинг биринчи ярмида Давлат бюджетидан ажратилган жами субсидияларнинг 70 фоиздан кўпи ёки 10,8 трлн.сўми тубга қулаётган энергетикага кетган. Бу сумма аслида кўпроқ, чунки масалан, жамоат транспорти (413 млрд сўм), геология ва разведка (377 млрд.сўм), қишлоқ хўжалиги (240 млрд.сўм) ва бошқа йўналишларга ажратилган субсидияларнинг катта қисми якунда кросс-молиялаштириш орқали энергетикларнинг қора туйнукка айланган қозонига тушади. Эътиборли жиҳати, ярим йилнинг ўзида (9,3 трлн.сўм) газ нархидаги фарқларни қоплаш учун бутун 2024 йил учун ажратилган (9,5 трлн.сўм) субсидиялар "ҳазм қилиб бўлинган". Яъни, тарифлар каррасига ошгандан кейин ҳам шонли энергетиклар бизни бюджет субсидияларини ўзлаштириш баҳонасида талашда давом этмоқда. Солиштириш учун ўтган йили, газнинг тарифи аҳоли учун 320 сўм, бизнес учун 660 сўмлигида жами 8,8 трлн.сўм субсидия ўзлаштирилган. Аввалроқ, газ учун субсидиялар ҳисоби ва ҳисобдорлиги очилиши, текширилиши кераклиги, бюджет ҳисобидан субсидияланаётган газ импортининг қанча қисми четга, яъни олигархлар чўнтагига кетаётгани ўрганилиши кераклиги ҳақида тўхталган эдик. Ҳозирча ҳамма жим. Иситиш билан боғлиқ ажратилган субсидияларнинг ҳам таги кўриниб қолган. Бутун йилга ажратилган 1,9 трлн.сўмлик субсидиянинг 1,5 трлн.сўми ўзлаштириб бўлинган. Ҳали бу йил ҳисобидан олдинда октябрдан декабргача иситиш мавсуми бор. Субсидияхўрликнинг динамикасига қаралса, шонли энергетиклар асло тўхтамоқчи эмас. Бу оддий тилга ўгирганда ойликлар ошмайди, пенсиялар ва нафақалар қадрсизланади, мактаблар қурилмайди дегани. P.S. Электр энергиясини харид қилиш ва сотиш нархлари ўртасидаги фарқни қоплаш учун ҳам 2,5 трлн.сўм субсидия ажратилган, лекин бунинг ҳисоби бўйича маълумот келтирилмаган.