Тадбиркорлар фаолиятида узилишлар олдини олиш учун уларни тезкор молиялаш воситалари ривожлантирилмоқда. Бу бўйича Президентнинг “Факторинг хизматлари бозорини жадал ривожлантириш чора-тадбирлари тўғрисида”ги Фармони эълон қилинди. Илгари факторинг фаолияти билан банклар, микромолия ташкилотлари ва бошқа ташкилотлар шуғулланиши мумкин эди. Лекин бунинг аниқ тартиби ҳеч қаерда белгилаб қўйилмаганди. Натижада тадбиркорларда факторинг каби тезкор молиялаш воситаларига эҳтиёж пайдо бўлаётганди. Мазкур Фармон билан Ўзбекистонда тадбиркорлик фаолиятини молиялаштиришнинг кўчар активларга асосланган инструментлари ривожлантирилиб, кичик ва ўрта бизнес субъектлари фаолияти узлуксизлиги таъминланади. Жорий йилнинг 1 июль куни Президент ва тадбиркорлар ўртасидаги очиқ мулоқот олдидан ташкил этилган учрашувда “Venkon Group” раҳбари Асқар Исмоилов худди шу муаммони кўтариб чиқиб, тадбиркорларнинг 70 фоиздан ортиғи молиявий муаммоларга дуч келаётгани, уларнинг айланма маблағлари 25 фоизидан ортиғи дебитор қарздорликка тўғри келиши ҳақида гапирганди. У бунга ечим сифатида қатор таклифларни ҳам илгари сурган. Бозорнинг рискни қабул қилувчи ихтисослашган ўйинчилари йўқлиги учун ҳамон бу борада оқсаб келаётган эдик. Албатта, бу бизнесда ликвидлик етишмовчилиги ва пул узилишларини бартараф этадиган универсал панацея эмас. Лекин бозорда факторинг компаниялари бўлиши керак. Бир муддат ўтиб, худди микромолиялаш сегменти сингари факторинг бозори ҳам фаол кенгайиб, қисқа молиялаштириш танловларидан бирига айланади. Фармон тўғридан-тўғри шу муаммоларни ҳал этишга қаратилганини кўриш мумкин. Демак, тадбиркорларимизнинг овози эшитиляпти, таклифлари инобатга олиняпти. Бу яхши тенденция. Олдимизда ҳал этилиши керак бўлган масалалар кўп, уларга ечимлар таклиф қилишда давом этавериш керак.