Таълим кредитини энди онлайн олиш мумкин Июль ойларида банк мобил иловалари бозорда ўз ўрнини эгаллашга уринаётгани ҳақида ёзгандим. Яна такрорлаб айтаман, мижозларнинг истаклари ва имкониятларига мос таклифлар бериш вақти аллақачон келган. Сенда қулайроқ ва тезроқми, мижозларинг ҳам кўпроқ бўлиши аниқ. Кеча ўқиб қолдим, ўша биз эслаган илова — "xazna"да имтиёзли таълим кредитини олиш жараёни тўлиқ онлайн шаклга ўтказилибди. Тасаввур қиляпсизми, мижоз ҳам, кафил ҳам банкка умуман бормайди ва таълим кредити расмийлаштирилади. Бугун олий таълимда ўқиётган талабаларнинг асосий қисми тўлов-контракт шаклида ўқиётганлигини ва уларнинг молиявий маблағларга бўлган эҳтиёжининг асосий манбаларидан бири таълим кредити эканлигини ҳисобга олсак, юқорида айтганимиз яхши ва муҳим янгилик. Вақт ва инсон ресурслари тежалишига олиб борадиган ҳар қандай ечимни олқишлаш керак. Халқ банкида мавжуд имкониятлар билан бундан ҳам катта ечимлар қилса бўлади.