Банк мобил иловалари ва уларнинг рақобати ҳақида Онлайн банк ва тўлов амалиётларида қўл келувчи банк мобил иловалари бугун молиявий саводхон аҳолининг яқин ёрдамчисига айланиб улгурди. Бундан 4-5 йил олдин бозорда номи чиққан айрим нобанк тўлов иловалари бугун бозорни банклар иловалари билан бўлишишга мажбур бўлмоқда. Бугун банк иловасида онлайн кредит ё омонат расмийлаштириш мумкинлиги илова учун янгилик эмас, бошқа мобил иловаларидан ажралиб туриш учун илованинг функционаллигини ошириш керак. Айнан шу ноодатий ва қулай функциялар билан бойитилган иловалардан бири — Халқ банкининг "xazna" иловаси ҳақида қисқача тўхталмоқчиман. Иловада бошқаларда учрамайдиган айрим қулайликлар борлиги, шубҳасиз, ўта талабчан фойданувчи учун ёқимли. Масалан, шахснинг Жамғариб бориладиган пенсия таъминоти маблағларини бошқариши мумкинлиги ёки пенсионерлар учун алоҳида "Менинг пенсиям" менюси остида яратилган имкониятлар, фуқаронинг суюнчи пулини олиши, халқаро имтиҳон (масалан IELTS)дан юқори балл учун компенсация пулини онлайн қайтариб олиш ва бошқа бир нечта имкониятлар мавжудлиги иловага устунлик бериши табиий. Ишга туширилганига кўп бўлмаган илова учун бу — катта прогресс. Бу борада илованинг кўрсаткичлари ҳам гапириб турибди. Албатта, бу каби мобил иловаларнинг кўпайиши ва бозоридаги рақобатнинг кучайишидан якунда фақат биз — фойдаланувчилар ютамиз. Яна бир жиҳат — етиб келинган жойда тўхтаб қолмаслик билан боғлиқ. Бозорда шов-шув яратган исталган илова қисқа муддатда ўз ўрнини йўқотиши мумкинлигини ўз кўзимиз билан кўрмоқдамиз. Шунинг учун тинимсиз янгиланишлар, тўхтовсиз ўзгаришлар ва функционал кенгайтиришлар ҳақида ўйлаш керак. Мижозларнинг молиявий имкониятлари ва операциялари кўламига қараб эгилувчан тариф пакетлари таклиф этиш вақти ҳам аллақачон келган.