Панель ўрнатишда ура-ура, пулини тўлашда отангга бор, онангга бор Ўзбек энергетикасининг тузалмас касалликларидан бири бу кампаниябозликка мутаносиб бўлмаган самарасизлик ва масъулиятсизлик ҳисобланади. Қуёш панелларини ўз бизнес объектларида ўрнатган ва яна ўрнатишни истаган тадбиркор Комил Исломов дуч келаётган муаммолар юқоридаги тезисларни яна бир бор исботлайди. “Бу ерда ҳам бир оғриқли масаламиз бор – қонунчилик бўйича “электросет” биздан оладиган токни 20 фоиз арзонга сотиб олади. Бугунги кунгача 800 млн сўмлик ток сотган бўлсак, пулини ололмадик. 7-8 ой ичида давлатга 1 млн 110 минг киловатт ток сотганмиз. Бошида камроқ бўлди, лекин борган сари ток ишлаб чиқаришни ошириб боряпмиз. Ваъда қилишяпти, келаси ойда тўлаб берамиз деб, шу нарсаларни ҳам назоратга олиш керак. Тўлаб бермаган тақдирда ҳам қайта ҳисоб-китоб қилиш керак – биз ишлатган электр токи пулини давлатга сотган токимиз ҳисобига қоплаб берса ҳам рози бўлардик. Давлатдан олишимиз учун олдиндан 100 фоиз тўлов қилишимиз керак, лекин сотган токимизнинг пулини ойлаб, йиллаб ололмаяпмиз”. Бинолари ва ўзларига тегишли ҳудудларига Қуёш панеллари ўрнатган тадбиркорлар умумий тармоққа узатилган ортиқча электр энергияси учун тўловлар амалга оширилмаётгани ҳақида аввал ҳам ёзгандик. Яъни бу муаммо бир тадбиркорнинг эмас, тизимнинг муаммоси. Қизиғи, шунча муаммога қарамай, тарифлар янада қимматлашишини ҳисобга олиб, Комил Исломов панелларни ўрнатишни кенгайтирмоқчи. Лекин жой муаммо. Шунингдек, ҳокимият томонидан қурилиш қилинаётган майдоннинг ҳар бир квадрат метрига тўлов ўрнатилгани, битта объектга 3 млрд 700 млн сўмлик тўлов чиқаётганидан шикоят қилади. Тадбиркорнинг умиди Президентнинг тадбиркорлар билан учрашувидан, унинг айтишича, муаммо Давлат раҳбаригача етиб борадиган бўлса, қарашлар ўзгариши мумкин.