Қуёш панелларида ишлаб чиқарилган электр энергияси учун тўловлар тўланмаётгани энг юқори даражада танқид қилинди Давлат раҳбари Бухоро вилоятида 2 минг хонадон ва 750 та тадбиркор панеллар ўрнатган бўлса-да, тармоққа берилган электр учун бор-йўғи 292 тасига пули тўлангани, оқибатда панель ўрнатганлар рағбат сезмаётгани кўрсатиб ўтган. Айтиш керакки, бу муаммо фақат Бухорода эмас, бутун Ўзбекистонда. Аҳоли ва тадбиркорларни мажбурлаб панель ўрнатиш кампаниябозлигида жавлон урган энергетиклар, тармоққа берилган электр энергияси учун пул тўлашни ойлаб пайсалга солиб келишмоқда. Бу ҳақда жуда кўп ёзилди. Бугунги йиғилишда панель қўйганларга тўловларни ўз вақтида тушириш ишларини ташкил қилиб, йил якунигача кескин ўзгариш қилиш топширилган. Мана энди Давлат раҳбарининг топшириғидан кейин шонли энергетиклар балки ҳаракатга тушишар? Ўзи шонли энергетикларнинг бирон иши йўқки, абсурдга дўнмаган. Тадбиркор панел ўрнатса, тармоққа узатган энергияси учун ойлаб пул тўлашмайди, мабодо тадбиркор осмондан ўрнатилган қароқчи лимитдан ўтиб кетса, 2-3 карра ортиқча тўлов ундиришади. Яна олдиндан 100% тўлов асосида. Панеллар орқали ишлаб чиқарилган ва тармоққв узатилаётган энергия бўйича шахссизлантирилган ва онлайн ахборот юритишни ташкил этиш масаласи ҳам кўтариши керак. Лекин бу ҳолда яна кўзбўямачиларнинг кети очилиб қолади. Онлайн база ишга тушса, давлат компаниялари, давлат ташкилотлари, давлат банклари ўрнатган, айниқса ташрифлар арафасида ура-ура томга қоқилган панеллар муляж ҳолатида ишламай ётгани билиниб қолади.