Панель намойиши: Қуёш панеллари ўрнатишда сон ортидан қувиш давом этмоқда Кечаги йиғилишда ҳисоб берган масъуллар соҳалар бўйича қўйилган вазифанинг бажарилишига тўхталиб, жами режалаштирилган панелларнинг 50 фоизи ўрнатилганига урғу беришган. Масалан, қуёш панели ўрганиш бўйича режа тиббиет муассасаларида 28 фоиз, олий ўқув юртларида 36 фоиз бажарилгани, Тошкент шаҳрида 26 фоизга бажарилгани танқид қилинган. Лекин ўрнатилаетган панеллар эълон қилинган қувватидан амалда кунлик, ойлик режимда қанча электр бераетгани, бир киловатт электр таннархи объектлар қирқимида қанчага тушаетгани ҳақида лом-мим дейилмаган. Ваҳоланки, асосий KPI қуёш панеллари сони эмас, генерация самарадорлиги ва таннархи бўлиши керак (ўрнатилаётган панелларнинг ўтган шу йил даврига нисбатан ва қўшни давлатлардаги муқобил таклифларга нисбатан қанчага қимматлаштирилгани ҳақида ҳамма ёзиб чарчади). Номини айтишим шарт эмас, пойтахтнинг қоқ марказидаги фалон давлат банки ўрнатган панеллар 30 фоизга чиққани йўқ, соҳанинг ичидаги пустон компания қувватни "заявленный" генерацияга яқинлаштира олгани йўқ. Кўзбўямачилик саноат даражасига етган вилоятларда нималар бўлаётганини айтиш ҳам шарт эмас. Наҳотки қуёш панеллари ўрнатилаетган объектлар бўйича қуввати, генерацияси, самарадорлик даражаси, таннархи онлайн режимда акс этиб турадиган Ягона мониторинг платформасини шакллантириб қўйиш шунчалар қийин? Шунда тепаниям, пастниям алдашга ҳожат қолмайди ку! Ахир давлат компаниялари ва ижтимоий объектларда кириш ва чиқишни қайд этувчи юқори даражада аниқликда ишлайдиган счетчиклар ўрнатаяпсизларку? Ё бундай эмасми? Давлат идоралари ва ижтимоий объектларни қўя турайлик. Тадбиркорлар, фермерлар, банк ва молия соҳасидаги субъектларни панелбозлик кампаниясига маъмурий мажбурлаш алоҳида мавзу. Қора туйнук. Бу ерда сифат ва кейинги назорат ҳақида умуман гап йўқ. Чунки саналганлар қулоғи тинч бўлиши учун томдаги ё омбордаги сотиб олинган панелни кўрсатса кифоя. Кўрсатиладиган нарса панель сони. Монтаж жараёнида ҳеч бир ҳисоб китоб, қуёшга, шамолга, жойлашувга профессионал ёндашувларсиз ура ура билан мардикорча усуллардан фойдаланилаётгани хақида Сарвар Каримовга айтсак, балки "Ҳоким бува"нинг давоми сифатида 'Панель бува" деган минисериалини олворади. Ўзбекистон қонунлари ишламайдиган Андижонда кам таъминланган аҳолига панель ўрнатиш (кимларнинг ва қайси манба ҳисобига деган саволни кўтармаяпман) роса намунага чиқарилган. Қолган ҳудудлар ҳам Анжан тажрибасини пайдар пай давом эттирмоқда. Кимдир бунинг ижтимоий, иқтисодий, техник ҳисобини олганми? Қуёш панеллари қайси ижтимоий тоифа ва истеъмол даражасидан кейин ўзининг нисбий афзаллигини ва кейинги самарадорлигиги яратади, деган саволни кимдир қўйганми? Февралда бошланган бу кампаниябозликдан ўтган 3 ойда қилинган ишлар бўйича менда ҳозирча битта таассурот бор: уларга электр эмас, панель керак. Чунки электр сўраладиган ноябргача яна 5 ой бор, унгача панелларни кўрсатиб турса бўлади.