Жанр қоидасига кўра кейинги тендерни ACWA Power ютса керак Давлетовўз Ғузордаги қуёш станцияси қуриш бўйича тендерни Masdar компанияси ютгани маълумоти билан бўлишмоқда. Зийрак ва закийлар тендер ўтиши учун спарринг рақиб сифатида танланган ACWA Power станциядаги аккумулятор тизими учун 1 МВт.соатига "рақиби" Masdar'дан тўрт баробар қиммат 24,4 цент нарх тақдим қилганига эътибор қаратган бўлсалар ажабмас. Яъни, ACWA Power ютишни феълан унча истамаган, балки ютқазишни била туриб, шу таклифни кўрсатган. Балки кейинги тендерда ACWA Power Masdar устидан реванш олар. Футболимизда шунақаси кўп учрайдику, тўғрими? Яна бир кўзни ўядиган ҳолат 1 кВт·соат электр энергияси учун ғолибнинг 3 центлик таклифи билан боғлиқ. Қачонлардир, узоқ эмас, 1,5-2 йил аввал ҳам ҳали қуёш панелчилиги воситасида миллиардларни ўзлаштириш кампаниявозлиги бошланмай туриб, айни шу Masdar компанияси ҳатто 1,8 цент ҳисобидан тендерларни ютган, энг қиммат таклифлари 2,68 цент ҳисобидан бўлган. Бутун дунёда қуёш энергиясининг таннархи ва сотиб олиш нархлари арзонлашишда давом этаётган вақтда, Ўзбекистонда тескариси, қуёш генерацияси лойиҳалари таннархи ва сотиб олиш кафолат нархлари қимматлаштирилмоқда. Балки шунинг учун аввалроқ рақобатли тендерларда лойиҳа ютиш учун ҳалол курашган инвесторлар ҳам бебилиска миллиардлар ва қон ҳидини сезиб ўзаро "договорняк"ка ўтишгандир. Ахир 25 йиллик кафолатли сотиб олиш тўлови барибир Ўзбекистонликлар бўйнига, ҳозирги ва кейинги авлод зиммасига тушса? Унгача ким бор, ким йўқ?