"Қуёш панелларини ўрнатишда кўзбўямачилик ва “қўшиб ёзиш” ҳолатларининг олдини олиш" Бугунги йиғилиш якунида Давлат раҳбарининг қуёш панелларини ўрнатишда кўзбўямачилик ва “қўшиб ёзиш” ҳолатларининг олдини олиш юзасидан топшириқ бергани бергани бежиз эмас. Бутун 2023 йил Ўзбекистонда панел ўрнатиш кампанияси шиорлари билан ўтди, тадбиркорлар, банклар, аҳоли — мактаб директорларидан маҳалла раисларигача, отинойи, ҳоким ёрдамчилари, фермерларгача бу кампаниядан ўзини четга ололгани йўқ. Панел кампанияси натижаси амалда қандай бўлганини аҳоли ҳам, бизнес ҳам бутун қиш ва шу кунларда ўз танасида сезмоқда. Келинг, рақамларга қайтамиз. 1 йил аввал, 2023 йил 16 февралда қабул қилинган қарорга кўра 2023 йилда: Ижтимоий соҳа объектлари ва давлат идораларида 219,4 МВт; Тадбиркорларнинг бино ва иншоотларида 742,7 МВт; Аҳоли хонадонларида 182,1 МВт, жами 1 144,2 МВт қувватли қуёш панеллари ўрнатилиши керак эди. Бугунги йиғилишда ижтимоий соҳа объектлари, корхона ва ташкилотлар, тадбиркорларга тегишли бинолар ва аҳоли хонадонларида умумий қуввати 457 мегаваттли қуёш панеллари ўрнатилгани айтилди. Демак, 2023 йилдаги панел ўрнатиш режаси 2024 йилнинг яна 2 ойини қўшганда ҳам 40%га бажарилмаган. 687,2 МВТлик режаланган қувват ишга туширилмаган. Эътибор берсангиз, кечаги энергетик чекловлар 700 МВтгача етган. Бошқача айтганда, ўтган йилги режалар ижроси "ура ура" кампаниявозликка ва пул ўзлаштириш мусобақасига айлантирилмай, соғлом ақл билан иш тутилганида ўтаётган қишда электр энергиясида узилишлар бўлмаслиги керак эди. Ҳаммадан қизиғи, ўрнатилган қуёш панеллари қанча электр энергияси генерация қилаётгани ҳақида ҳеч қандай даврий ва очиқ маълумот мавжуд эмас. Агарда 2023 йил режалари бажарилганида ўрнатилган қуёш панеллари 900,3 млн. кВт.соат электр энергияси ишлаб чиқариши лозим эди. Бу Туркманистондан 45 кунлик электр энергияси импорти билан тенг. Очиқ манбалардан қидириб, Энергетика вазирлиги ўтган йили давомида фақат бир марта 9 июнь куни ижтимоий соҳа объектлари, корхона ва ташкилотлар, тадбиркорларга тегишли бинолар ва аҳоли томонидан қуввати 240 МВт бўлган панеллар ўрнатилгани ва панеллар суткасига 1,1 млн.кВт.соат электр энергияси ишлаб чиқараётганини маълум қилганди. Шундан буён ҳамма жим. Триллионлаб кредит, бизнес ва аҳоли маблағлари ҳисобига ўрнатилган панелларнинг қанчаси ишламоқда ва улар қанча электр ишлаб чиқармоқда? Балки томларга қоқилган муляж панелларни ишга тушириш, генерация бўйича кунлик ҳисобот бериш, маълумотларни очиқлаш вақти келгандир?