​2024 йилда қуёш панелларини ўрнатиш режаси 3 баробардан кўпроққа камаяди Ўтган йилги кампаниябозликда йўл қўйилган хатолар, беҳуда харажатлар 2024 йилда такрорланмаслигига умидлар йўқ эмас. Ҳарқалай, 2024 йил Давлат дастурида қуёш панеллари ўрнатиш бўйича мўлжалли кўрсаткичлар 2023 йилда белгиланган режадан 3 баробарга камроқ белгиланган. Дастурга кўра, 2024 йилда Ижтимоий соҳа объектлари ва давлат идораларига 60,9 МВт, тадбиркорлик субъектларига 175,7 МВт, аҳоли хонадонларига 102,2 МВт, кўп қаватли турар жойларга 8,0 МВт, жами 346,8 МВт бўлган кичик қувватли қуёш панеллари ўрнатишлари керак бўлади. Солиштириш учун 2023 йил учун белгиланган режа 1 144,2 МВт эди, амалда эса 457 мегаваттли қуёш панеллари ўрнатилган. Демак, панел ўрнатиш учун тадбиркорларга, давлат ва маҳалла хизматчиларига мажбурлашлар, кредит олишга ундашлар камроқ бўлади. Катталар юрадиган асосий кўчалар ва айтайлик, ташрифларда ялтираб кўриниши учун аэропортдан келиш йўлларида кўзкўрдига ўрнатилган муляж панеллар ниҳоят ишга туширилади.