Энергетик сакраш 2.0 (Умидимиз қуёшдан 2) Бундан ташқари 20 320 ижтимоий соҳа ва давлат идораларида жами қуввати 219,4 Мвт бўлган панеллар ўрнатилиши керак. Қиймати кўрсатилмаган бу харажатлар катта эҳтимол бюджетдан қопланади. Маълумот учун, кечагина Тошкент шаҳридаги 1 103та бюджет ташкилотига қуёш панеллари ўрнатиш учун жами 415 млрд.сўм ажратилган. Бу фақат бошланиши. Ҳаммаси бўлиб 7 977та объектга қуёш панеллари ўрнатилиши керак. Шундан ўлчов олинса, пойтахтнинг ўзида жами 3,2 трлн.сўм бюджети пули панелларга сарфланади. Қайтарамиз, афзаллик, нисбий афзаллик, қиймат ва бир киловатт электр таннархини ҳеч ким ҳисоблаётгани йўқ. Давом этамиз. Тадбиркорлар ҳам кампаниядан четда турмаслиги қайд этилган. Йил давомида хусусий бизнес 11 019та объектда 742,7 МВтлик панеллар ва 227та объектда 555,4 МВт қувватлик кичик қуёш станциялари барпо этиши керак. Бу вазифа давлат банкларига, хусусан, кечагина хусусийлаштирилгани эълон қилинган Ипотека банкига топширилган. Йўналтириладиган кредит маблағлари ҳажми номаълум. Панелларга йўналтириладиган кредитлар шунчалик даражада катталигидан Марказий банк риск даражасини ноллаштиришни таклиф этмоқда. Буям ҳаммасимас. Юқоридагилардан ташқари 36 686 хонадонда ҳам умумий қуввати 182,1 МВт бўлган қуёш панеллари ўрнатилиши керак. Бунга ҳеч ким сайламаган ва худо бас келмаса, ҳеч ким бас келмайдиган ўзбек ҳокимлари масъул қилиб белгиланган. Эгаси итга, ит қуйруғига дегандек, ҳозир ҳокимлар бу ишга банклар ва тегишли ҳудудлардаги ташкилотларни мажбурламоқда. Яна қиймат, таннарх ва афзаллик ўлчовлари номаълум. 2023 йил 1 майдан бошлаб янги қурилган 765 кўп қаватли уйда умумий қуввати 15,3 МВТли панеллар ўрнатилади. Бунинг харажати уй-жой қурувчилар ва хонадон эгалари зиммасида. Юқорида саналганлар асосан қуёшга оид режалар эди. Энергетик сакраш 2.0 режаларининг давоми ҳақида эртага тўхталамиз. @the_bakiroo