Қуёш панеллари ўрнатиш ва бунинг учун кредит олишга мажбурлаш тўхтатилиши керак! 1 октябрдан бошлаб 1 квт.соат электр энергияси учун тарифларнинг 450 сўмдан 900 сўмгача оширилиши бизнесга нисбатан қуёш панеллари ўрнатишга мажбурлаш ва маъмурий босимлар ўтказиш тадбирларига чек қўйиши керак. Йил бошида қабул қилинган қарорга кўра тадбиркорлар 11019 объектда 742,7 МВт қувватлик қуёш панеллари ўрнатишлари, 227 та объектда эса 555,4 МВт қувватли ФЭСлар қуришлари кераклиги белгиланган. Бунинг учун Марказий банк ва тижорат банклари масъул этиб белгиланган. Тарифларнинг арзонлиги шароитида иқтисодий рағбат йўқлиги учун қуёш панелларини ўрнатиш ихтиёрий равишда кечаётгани йўқ. Бир тарафдан маҳаллий ҳокимият идоралари, иккинчи тарафдан Марказий банк режасини бажариши керак бўлган банкларнинг босими остида бизнес тузилмалар каррасига қимматлаштирилган панелларни ўрнатишга мажбур бўлишмоқда. Жараёндаги кўзбўямачиликлар, самарасиз маъмурчилик ва иқтисодий манфаатлар йўқлиги ҳақида жуда кўп ёзилди. Ўтаётган ҳафтада қуёш панелларини ўрнатишдан бош тортган бизнес субъектларини электр тармоғидан узилаётгани ҳолатлари матбуотда ҳам ёритилди. Давлат раҳбари саноат корхоналарини электрдан огоҳлантиришсиз узмаслик бўйича топшириқ берди. Мана энди 1 октябрдан бошлаб электр генерациясидан тортиб, уни тақсимлаш ва етказишгача бўлган харажатларни қоплайдиган даражада тарифлар бор. Шуларнинг ҳаммасини инобатга олиб, 9 ойдан буён давом этаётган самарасиз ва ҳаттоки зиёнли ҳаракатларга чек қўйиш вақти келганини тушуниш керак бўлади. Энди кимки қуёш панели ўрнатмоқчи бўлса, ҳисоб-китобини қилсин, шартнома бўйича марказий таъминотдан арзон тушса ё ўзи учун захира манба бўлишини кўзласа, шу унга манфаатли бўлса, ўрнатсин. Истаса ўзи кредит олсин, истаса ўзи Хитойдан панелларни олиб келсин (ўртамчи ўғрилардан олишга мажбурланмай). Бунга мажбурлаганни, у ҳоким бўладими, вазирми ё банкирми, жазолаш, жазолагандаям шафқатсиз жазолаш керак бўлади.