​Инфляцион кутилмалар кескин ёмонлашган Август ойи сўровларига кўра, инфляцион кутилмалар кескин ёмонлашган ва қишдаги энергетик кризисдан кейинги февраль ойидаги максимумларни янгилаган. Демак, август ойида аҳолининг инфляцион кутилмалари 14,2% (+1,2%)га, бизнеснинг кутилмалари 14,4%га (+1,1%) етган. Охирги 2 ойда бизнес аҳолидан кўра пессимистроқ бўлиб қолмоқда. Ҳудудлар орасида энг ёмон кутилмалар Тошкент шаҳрида (аҳоли 15,3%, бизнес 15,5%). Августда валюта курсининг "тўғирланиши" кутилмаларда ўзининг изини қолдирган. 70%дан ортиқ респондентлар Валюта курсининг ўзгариши омилини асосий инфляцион хатар ўлароқ кўрсатишган (сўровлар давридаги абсолют рекорд). Ёқилғи ва энергия нархининг қимматлашиши омили иккинчи асосий хатар ўлароқ сақланмоқда ва бу бўйича хавотирлар кучаймоқда (аҳоли ўртасида 43%, бизнесда 38% респондентлар). Сентябрь ойидаги сўровларда ушбу омил бош хавотирга айланса керак. Аҳоли орасида 9-12%, 13-16%,17-20%, 21-25% ва 31-50% даражасида инфляция кутаётганлар кескин ошган. Бизнесда энг ёмон инфляцион кутилмаларни қурилиш сегменти қайд этмоқда (18%).