​Куз-қиш мавсумига ўтган йилгидан-да кўпроқ хавотир билан кирилмоқда Сентябрь ойида инфляцион кутилмалар яна ёмонлашган. Аҳоли 13,3%лик (+0,2%), бизнес эса 12,6%лик (+0,1%) инфляция кутмоқда. Кутилмаларнинг ёмонлашуви Ўзбекистонда доим хавотир билан кутиладиган куз-қиш мавсуми яқинлашаётгани билан ҳам боғлиқ бўлган. Эътиборлиси, бу мавсумий хавотирлар ўтган йилгидан ҳам кўпроқ ёмонлашган. Хусусан, Ёқилғи ва энергия нархларининг қимматлашишидан 47% респондентлар чўчимоқда, ўтган йилнинг сентябрида бу кўрсаткич 45% бўлган. Коммунал хизматларнинг қимматлашиши 45% сўралганларни ташвишга солмоқда (ўтган йили 34%). Транспорт харажатларининг ошиши 28% сўралганларни хавотирга солмоқда (ўтган йили 23%). Хуллас, ўзбекистонликлар айтилаётган ваъда ва қасамларга қарамасдан куз-қиш мавсумига ҳар доимгидан ҳам кўпроқ умидсизлик билан кирмоқда, бу эса инфляцион кутилмаларнинг ёмонлашувига кўчмоқда. Аҳоли орасида энг ёмон инфляцион кутилма яна Тошкент шаҳрида жамланган (15,2%). Бизнес орасида эса Тошкент вилоятида (14,4%). Энг юқори даромад олувчиларнинг кутилмалари кўпроқ ёмонлашган ва 15,8%га етган (+1,1%). Тошкент шаҳрида 17% ва ундан юқори инфляция кутаётганлар улуши 36%га етган (+3%).