НКМКда харажатлар тезроқ ўсишда давом этмоқда Ҳа, 2021 йилдан кейин ёмонлаша бошлаган молиявий натижалар 2023 йил якуни (иккинчи ярми) ва 2024 йил ярим йиллиги билан яхшиланишни бошлаган. Лекин тушумга нисбатан харажатларнинг тезроқ ўсиши тўхтагани йўқ (компания учун энерготарифлар ўтган йили баҳордаёқ оширилган). 2024 йилнинг ярим йиллигида олтиннинг қимматлашуви ҳисобига тушумнинг ўсиши 21,3%ни ташкил этган бўлса, харажатларнинг ўсиши 24,8%дан иборат бўлган. Олтин нархларининг тескари динамикасида тушум камайиши табиий, лекин харажатлар камайиб қоладими? Маълумот учун, олтиннинг таннархи ўсишдан тўхтамаган ва 907 долларга етгани айтилмоқда. Компаниянинг кредит билан боғлиқ мажбуриятлари камайишни бошлаган, лекин бошқа мажбуриятлари, хусусан, савдо ва кредитор қарздорликлари (+262 млн.доллар), солиқ бўйича мажбуриятлар (+247 млн.доллар) ортган. Банк кредитлари таркибида россия банкларининг 489 млн.долларлик кредити мавжудлиги хавотирга солади. Наҳотки, НКМК глобал бозорлардан қувилган россия банкларидан кўра арзонроқ кредит жалб қила олмаса? Қарз нархининг ўсиши тўхтамаган ва ўртача 10,43%га етган (ўтган йилнинг шу даврида 8,57% бўлган). Конлар ва фойдали қазилмаларга бўлган ҳуқуқларнинг қиймати ўтган йилги 3 864 млн.доллардан 3 351 млн.долларгача қисқарган.