Олтин нархларининг ошиши фонида НКМК қарзларини оширмоқда Ўзбекистоннинг олтин тожи Навоий кон металлургия комбинати Лондон фонд биржасида навбатдаги еврооблигацияларни жойлаштирган. Янги қарз миқдори 500 млн.доллар. Муддати 5 йил, ставкаси 6,75%дан. Бу компания бондларининг учинчи чиқарилуви. Ўтган йили ҳам еврооблигациялар орқали октябрда 4 йил (6,70%) ва 7 йилга (6,95%) 500 млн.доллардан, жами 1 млрд.долларлик қарз жалб қилинганди. НКМК баёнотига кўра, янги қарзлар эски қарзларни қайта молиялаштиришга йўналтирилади Ўтган 2024 йилда олтин нархларининг кескин ошишда давом этганига қарамай НКМК қарзлари ошишдан тўхтамаган. Молиявий ҳисоботларга кўра, йил давомида НКМКнинг қарз портфели 2,3 млрд.доллардан 2,5 млрд.долларгача етган. Қарзларнинг ўртача тортилган ставкаси 8,81%ни ташкил этган. Компания 2025 йилда ҳам қарзлар жамғаришда давом этмоқда. Олтин нархлари юқорилигида НКМК канали орқали янги ва янги қарзлар олиш гўёки жозибали йўл туюлиши мумкин. Лекин инобатга олиш лозимки, сотиш харажатлари, таркиби очилмаган маъмурий, молиявий ва бошқа харажатлар, шунингдек, солиқ юки юқори суръатда ошмоқда. Энергетикада бўлгани сингари таннархнинг ошириш методичкаси НКМК мисолида ишламайди, чунки олтин ташқи, рақобатли бозорда сотилади, газ сингари таннархни шишириб тарифлар орқали ўзбекистонликлар бўйнига илдириб юбориб бўлмайди. НКМК мисолидаги қарзга ботириш сценарийлари бўғзигача қарзга ботирилган Ўзбекнефтегаз ёки Темир йўлларига қўлланилган схемаларнинг оқибати каби бўлмайди. Умид шуки, кимдир буни тушунмоқда. Йирик қарз олувчилар учун алоҳида нормалар тезроқ ишлаб чиқилиши керак.