​Ўзбек олтинининг таннархи юқори даражада ва жуда тез ошмоқда Ўзбекистоннинг энг йирик ишлаб чиқарувчиси ва биринчи рақамли солиқ тўловчиси НКМКда 2025 йил 1- ярим йиллигида ишлаб чиқариш ва қўллаб-қувватлаш харажатлари (AISC) 1 унция олтин учун 1 164 долларга етган. Маълумот учун, янги давр ибтидоси 2017 йилнинг бошида олтин 1 150-1 200 доллардан сотилган. Бошқача айтганда, агарда олтин нархи 2017 йил даражасига тушиб кетса, мослашилган ва киритилган харажатлар туфайли олтин ишлаб чиқариш рентабелли бўлмай қолади. Яқин тарихда олтиннинг рекорд даражада қимматлашиши ва рекорд даражада арзонлашиши кўп бўлган. Масалан, 1996 йилда 415 долларгача қимматлаган олтин, 1999-2000 йилларда 250 долларгача тушиб кетган (Ўзбекистон учун энг оғир молиявий йиллар). 2008-2009, 2011-2012 йилларда ҳам олтиннинг кескин қимматлашиши ва кескин арзонлашиши бир неча бор кузатилган. Масала шундаки, очиқ маълумотларга кўра олтиннинг шартли ишлаб чиқариш таннархи (AISC) жуда тез ва доимий равишда ошиб бормоқда: 2022 йилда 778 доллар; 2023 йилда 866 доллар; 2024 йил 1- ярмида 907 доллар; 2024 йил якуни билан 979 доллар ва 2025 йил 1- ярим йиллигида энди 1 164 доллар. Компания таннархнинг қимматлашишини роялти ошиши билан изоҳлаган. Лекин фақат роялти омили таннархни шиширмаётгани аниқ. 2023 йил бошида аъзолари ҳукумат вакилларидан иборат НКМК кузатув кенгаши олтин котировкалари 1 600 долларга тушиб кетган даврда олтин таннархини ошиб бораётганини муҳокама қилганди.