Олтин ишлаб чиқариш қисқармоқда, таннарх ошмоқда Юқори иқтисодий ўсиш фонида доимий фокусда тутиш лозим бўлган жиҳатларни эътибордан қочирмаслик керак. Биринчидан, олтин таннархи ошишдан тўхтамаган. Олтин таннархи ўтган йили 2017 йилдаги котировкаларга етиб улгурганди. Бу йил 1 унция олтин таннарх яна 8,2%га ошган (1 260 долларгача) ва Давлат раҳбари ҳам бунга танқидий эътибор қаратгани бежиз эмас (бошқа гигантларда ҳам таннархни шишириш тўхтамаган). Иккинчидан, ташқи қарз билан бир қаторда юқори пул оқимини таъминлаётган олтин ишлаб чиқариш физик ҳажми қисқара бошлаган. Ҳозирча олтин тожимиз НКМК мисолида. ОТМК бўйича очиқ маълумотлар йўқ. Лекин Марказий банк олтин ишлаб чиқарувчилардан ҳар ойда сотиб олаётган олтин физик ҳажми ҳам ўтган йилдагига қараганда қисқарган. Учинчидан, НКМК кўрсатаётган натижалар ва табиийки, Навоий вилоятида ҳудудий ЯИМнинг номиналда рекорд ўсиши бу самарадорлик, маҳсулдорлик ёки рақобатбардошлик ошиши натижаси эмас. 146% ташқи конъюнктура омили. Тўртинчидан, олтинга оид хавотирлар мисга нисбатан ишлатилиши керак. Хўп, миснинг юқори нархлари каррасига қимматлаштирилган фабрикаларни ёпиб кетаётгандир. Кейин-чи? Шу қийшиқ модель яна давом этадими? Миснинг таннархида 3- фабрика ишга тушгач, охирги йилда, охирги 5 йилда қандай ўзгаришлар бўлди? Бу тенденциялар қўрқинчли эмасми? Бешинчидан, олтин ва мис бюджет даромадларини белгилаётган экан, бу масалага ижтимоий солиқ, пенсия тизими мувозанати, иситишга ва транспортга субсидиялар, солиқларни ошириш ва янги солиқларни жорий қилишдан кам бўлмаган даражада эътибор қаратиш лозим бўлади.