​Газга оид давлат компаниялари сентябрда солиқ тушумларини оширишган Бир неча ойлик қисқаришдан кейин сентябрь ойида йирик солиқ тўловчилар қаторидаги UzGasTrade, Hududgazta'minot, O'zbekneftegaz ва O'ztransgaz солиқ тушумларини ўтган ойларга нисбатан сезиларли тарзда оширишган. Сентябрдаги солиқ тушумларини ўтган йилнинг шу давридаги солиқ тушумлари билан солиштиришнинг иложи йўқ (очиқ маълумотлар мавжуд эмас), лекин билвосита манбалар солиқ тушумлари йиллик ҳисобда қисқаришда давом этаётганини қайд этишмоқда. Сентябрдаги ижобий тенденция қайси омиллар ва қайси солиқлар ҳисобига рўй бергани очиқланмаган. Масалан, ягона газ сотиб олувчи ҳисобланадиган ва бюджетдан энг катта субсидия оладиган UzGasTrade молиявий ҳисоботлар ва йирик битимлар билан боғлиқ муҳим корпоратив маълумотларни умуман очиқламайди. Бутун Ўзбекистоннинг ва импорт, экспорт бўйича газ савдосини ўзида жамлаган компанияга қарши Қонунчилик бўйича бирон жазо ёки чора кўрилмаслиги ҳам нормага айланган (балки кузатув кенгаши ҳукумат вакилларидан иборат бўлгани учун).