Бешинчи фабрика: Каррасига қимматлашаётган Ёшлик 1 кони лойиҳаси янада қимматлашади Чунки ўтган йили сентябрда иш бошлаши керак бўлган учинчи фабрика ишга тушгани йўқ, лекин тўртинчи фабрика қурилишига расмий старт берилди. Бу ҳали ҳаммаси эмас, анонс қилишларича бешинчи фабрикани ҳам лойиҳалаштириш бошланган. Демак, қиймати 12,5 млрд.долларга етган лойиҳа устига яна бир неча миллиард доллар миндирилади. Шу пайтгача қилинган ишларнинг ҳақиқатдаги қийматини ўлчаш бўйича мустақил аудит масаласи кўтарилаётгани йўқ, қанақадир халқаро тендер ҳақида гап сўз йўқ. Демак, бешинчи фабрика учун ҳам пудратчи ўзгармайди. Лекин бундай карра-каррасига қимматлашув ортидан лойиҳанинг экономикаси қандай бўлади? У ўзини қачондир оқлайдими? Неча йилда оқлайди? Айтайлик, мис нархи 4 йил аввалгидек 5 минг долларга тушиб кетса нима бўлади? Қарзларни ким тўлайди? Иккинчи рақамли солиқ тўловчи бўлган ОТМКнинг бошига Ўзбекнефтегазнинг аянчли аҳволи тушмайдими? Ё мақсад ўнлаб лойиҳаларни баравар бошлаган, ҳали биронтасини мантиқий ниҳоясига етказмаган ёки аралашган биронта лойиҳаси ваъда қилинган натижаларни қайд этмаган пудратчига пул чиқариб бериш холосми?