​Палов нархидаги ўзгаришлар ва расмий инфляция кўрсаткичи кескин фарқланади Албатта, расмий инфляция 10,2%гача пасайгани ва йил охирида 9,5%га тушиши ҳақидаги чиройли прогнозлар расмийларнинг кўзини қувонтирмаслиги мумкинмас. Лекин ўзбекистонликлар яшаётган реалликлар рақамлари сувалганидан бутунлай бошқа тасвирларни тақдим этаётган бўлса, нима қилиш керак? Помидор, пропан, бензин каби нарх ўзгаришлари жуда оғриқли қабул қилинадиган, балки кенг истеъмолчилар учун репрезентативлик бермайдиган маҳсулотларни қўя турайлик. Мана, паловни олайлик. Паловнинг ўзбекистонликлар учун алоҳида хусусияти шундаки, уни ҳамма ейди. Бой ҳам, камбағал ҳам, ўртаҳол ҳам. Тўнғиз қўпгур ўғри олигарх ҳам, ўғри олигарх томонидан таланаётган бечора ҳам. Паловнинг мундарижасида корзинадаги энг муҳим озиқ-овқатлар, иш ҳақи, ёқилғи, транспорт ўтиради. Палов таъбир жоиз бўлса, Ўзбекистонда энг рақобатли маҳсулот, ҳатто исқирт советлар пайтидаям ош вазирлиги бўлмаган, ош давлат назоратида турмаган. Мана шу паловимиз ўтган 1 йил давомида ҳудудларимиз бўйлаб 23,7%гача қимматлаган (2023 йил октябрдан 2024 йил октябргача). Яъни палов нархи расмий инфляциядан юқори суръатларда, Ўзбекистоннинг ярмида каррасига юқори суръатларда ошган (Сирдарё аномалиясидан ташқари). Девзиранинг кони Андижонда 23,7%га, қолган гуручларнинг ватани Хоразмда 21,0%га, республиканинг барча ошлари жамланган ва энг кўп ош ейиладиган пойтахтда 19,1%га. Қайтараман, бу расмийларнинг ўзларининг рақамлари (бу рақамларгаям ўзи анча савол бор). Шундай экан, ҳурматли инфляция рақамларининг ижодкорлари, ҳар куни қийшиқ ойнага разм солиш билан бирга ош-пош еб туринглар, ошга борганда нархини сўранглар, солиштиринглар.