Муқобил сценарий Муқобил сценарийда 2025 йил якуни билан тўлов балансининг жорий операциялари ҳисоби ЯИМнинг 6,5-8 фоизига тенг манфий сальдо билан шаклланиши тахмин қилинмоқда. Муқобил сценарийда, тўлов баланси кўрсаткичларининг шаклланишига қуйидаги омиллар таъсир қилиши мумкин: 1. Геосиёсий вазиятнинг кескинлашиши ва ташқи савдода фрагментация жараёнларининг кучайиши оқибатида Ўзбекистоннинг асосий савдо ҳамкорларида иқтисодий фаолликнинг кутилмаларга нисбатан паст даражада бўлиши ва ялпи талабнинг қисқариши; 2. Халқаро бозорларда Ўзбекистоннинг асосий экспорт товарлари (рангли ва рангсиз металлар, пахта хомашёси, озиқ-овқат маҳсулотлари) нархларининг пасайиши; 3. Глобал инфляцион жараёнлар кучайиши фонида пул-кредит шароитларининг қатъий даражада сақланиб қолиши натижасида ташқи қарз маблағларига хизмат кўрсатиш харажатларининг ортиши ва хорижий инвестициялар оқимининг камайиши; 4. Санкцияларнинг кучайтирилиши оқибатида меҳнат муҳожирларини қабул қилувчи анъанавий мамлакатларнинг валюта курсларидаги юқори тебранишларнинг кузатилиши ва тўлов тизимларидаги узилишлар ортидан трансчегаравий пул ўтказмалари ҳажмининг камайиши; 5. Якуний истеъмол харажатлари кўпайиши ва инвестициявий фаолликнинг жадаллашиши натижасида ялпи талабнинг ошиши машина-ускуна ва транспорт воситалари (давлат ва хусусий инвестиция дастурлари доирасидаги йирик ҳажмдаги товарлар), энергоресурслар ва бошқа хомашёлар импорти ўсишида ўз аксини топиши мумкин.