Кредит картаси микроқарз эмас Марказий банк кредитлар тўпланиши (концентрацияси) коэффициентларига доир янги пруденциал талабларни киритмоқда. Унга кўра, хусусан, Банк томонидан жисмоний шахсларга ажратилган микроқарзлар (шу жумладан, овердрафт ва кредит картаси) суммаси банкнинг жами кредит портфелидаги улуши 25 фоизидан ошмаслиги белгиланмоқда. Бошқача айтганда, 2023 йилда автокредитларга нисбатан киритилган пруденциал талаблар энди микроқарзларга нисбатан ҳам қўллланила бошлайди. Албатта, микроқарз бозорининг атипик қизиб кетгани, айниқса, охирги 1,5 йил ичида банкларда микроқарз ажратиш ниқобланган автокредитга айлангани ва ўзи умуман микроқарзлар энг кўп миқдорига муносабат ҳақида жуда кўп тўхталинди. Шу маънода банклар учун фойда ортидан қувишга жудаям қулай, лекин примитив маҳсулотга айланган, тайёргарликсиз қарздорларда эҳтиёткорлик ва саводхонлик етарли эмаслигида жозибадор кўринадиган микроқарзларга нисбатан регуляторнинг кўзқараши ўзгарганидан хурсанд бўлиш керак. Айни пайтда микроқарз тоифасига кредит карталари қўшиб қўйилганига рози бўлиш қийин. Чунки кредит карталари риск профили, мазмуни, ёндашуви ва қамрови жиҳатидан бутунлай бошқа технологик ва маданий маҳсулот ҳисобланади. Қайтанга юқори молиявий саводхон, интизомли ва масъулиятли қарздорлар тоифасини кенгайтириш учун кредит карталарига ўтиш рағбатлантирилиши лозим. Кредит карталари соғлом истеъмол танловини, шаффофликни оширади, яширин иқтисодиётга энг кам боғланган восита ўзи шу. Қолаверса, фоизсиз давр мавжудлиги қарзга нисбатан эътиқодли қарашга эга қарздорлар учун ҳам жозибали. Ўзбекистон кредит карталарининг бозордаги ўрни ва улуши масаласида кредит картаси социал статусга айланган ривожланган дунедан жудаям орқада. Шунинг учун, янги пруденциал талабларда микроқарзларга қўлланиладиган чоралар кредит карталарига жорий қилинмаслиги тўғри бўлади.