Чакана кредитлашдаги устуворлик ипотека ва кредит карталарида бўлиши керак Ўзбекистонда чакана кредит бозорининг энг катта қисмини, афсуски, эски кредит ва муаммоли мажбуриятларни ёпишга (қайта молиялаштириш) йўналтирилаётган автокредитлар ва микроқарзлар ташкил этишда давом этмоқда. Бироз қисқарганига қарамай, жами ажратилаётган кредитларнинг 60%дан зиёди на истеъмол талаби ва на иқтисодий ўсишга етарли омил бўладиган шу икки каналга тўғри келмоқда. Солиштириш учун, қурилиш ва ишлаб чиқаришни рағбатлантирадиган ипотека кредитлари жами ажратилаётган кредитларнинг 15%идан ошаётгани йўқ. Истеъмолни росмана кенгайтирувчи ва масъулиятли қарздорларни яратадиган овердрафтлар улуши кулгули 1,0% атрофида. Ривожланган дунёда асосий кредит маҳсулоти бўлган кредит карталари улуши ҳам шунинг ичида. Идеалда банклар нафақат фойда, келажакдаги активлар сифати ва бозордаги репутациясини инобатга олган ҳолда, узоқ муддатли молиялаштиришда кўпроқ бирламчи ипотека ва қисқа муддатли молиялаштиришда кредит карталарига устуворлик беришлари керак бўлади. Марказий банк ялпи талабни яратмайдиган, спекуляция ва муаммоли кредитларни ёпишга йўналтилаётган, яширин иқтисодиётни кенгайтиришга туртки бераётган бебилиска кредит маҳсулотларига нисбатан юқори риск шкалаларини қўллашда собитқадамликни давом эттириши керак.