Ижтимоий ёрдам кўрсатишнинг навбатдаги “мақбуллаштириш тажрибаси” бошланмоқда Ҳукумат қарори билан камбағал оилаларга ижтимоий шартнома шартларига боғлаган ҳолда ёрдам кўрсатилиши белгиланмоқда. Шартнома асосида кам таъминланган оилаларга ёрдам чоралари 2025 йил 1 мартдан Сирдарё вилоятининг Ховос туманида, қолган ҳудудларида эса 1 майдан амалга оширилади. Ҳужжат билан камбағал оилаларга қўллаб-қувватлаш чоралари меҳнатга лаёқатли оила аъзоларининг бандлигини таъминлаш, ўз томорқа ерларидан самарали фойдаланиш, таълим олиш, касб-ҳунар эгаллаш, чет тилларни ўрганиш ва бошқа шартларни ҳисобга олган ҳолда ижтимоий шартнома асосида кўрсатилади. Кам таъминланган оилалар реестрига киритилган оилалар томонидан ижтимоий шартнома шартлари бажарилмаган тақдирда, «маҳалла еттилиги»нинг коллегиал қарори билан бу оилаларга тўланадиган кам таъминланган оилалардаги болаларга нафақалар ва моддий ёрдам миқдорларини 30 фоизгача камайтириш тартиби жорий этилади. Қуйидаги ижтимоий ёрдам ва хизматларни тўхтатишга ёки камайтиришга йўл қўйилмайди: 18 ёшгача бўлган болаларга ногиронлик нафақаси; Парваришлаш нафақаси; Ногиронлик нафақаси; Боқувчисини йўқотганлик нафақаси; Ёшга доир нафақа; Қонунчилик ҳужжатлари билан кафолатланган кўмак чоралари, шу жумладан, ижтимоий ёрдам ва хизматлар. Мазкур тажрибанинг маъмурчилиги қиймати ва тежаб қолинадиган маблағлар ҳажми, тежалган маблағларнинг қай мақсадларга йўналтирилиши маълум эмас. Ҳужжат чуқур ўрганиб чиқилиши талаб қилинади.