Давлат банклари улар томонидан микромолия, лизинг ва суғурта ташкилотларининг ташкил этиши қонунга зидлигини билишадими? Битта товар бозорида бешта ва ундан ортиқ хусусий тадбиркорлик субъектлари фаолият юритиб келаётган соҳаларда давлат иштирокидаги хўжалик юритувчи субъектларнинг, шунингдек уларнинг аффилланган шахсларининг ва хўжалик фаолиятини амалга ошириш ваколатлари берилган давлат муассасаларининг таъсис этилишига (ташкил этишга ташаббус кўрсатишга) йўл қўйилмайди. Бу қоида қабул қилингани 5 йилдан ошди. Қонундаям бор, кечаги фармондаям яна бир бор акс этган. Лекин айрим чиновникларнинг чўнтагига айланиб қолган давлат банклари микромолия, суғурта ва лизинг компанияларини кимўзарга тузишда давом этмоқда. Ваҳоланки, бу бозорларда ўнлаб хусусий компаниялар ва очиқ рақобат мавжуд. Паразитлашган давлат компанияларига бу секторларда нон йўқ. Нимага унда давлат банки яна давлат компаннияси тузишдан тўхтамаяпти? Чунки ҳар битта давлат банки томонидан тузилган янги компания бу янги чўнтак дегани, зарарни шишириб, пул ўзлаштириш дегани. Давлат банклари исталган нормал ташаббусни пул ўзлаштирувчи бузуқ ҳаракатга айлантириб юборишда чемпион (микромолия компаниялари ташкил этиш пойгасидан кейин охирги чемпионат факторинг компаниялари ташкил этиш бўйича бўлиб ўтди). Афсуски, Марказий банк уларни рўйхатга олишда давом этмоқда. Шу кунларда айрим зараркунанда давлат банклари кўчмас мулк олди сотдиси ва ижараси билан билан шуғулланадиган шўъба компаниялар тузиш режаси билан юрипти. Гап фақат давлат банкларида эмас. Исталган давлат ва давлат назоратидаги компанияда шу аҳвол. Рақобат қўмитаси қонунга зид равишда давлат иштирокидаги корхоналар ва уларнинг аффилланган шахслари ташкил этган компанияларни тўлиқ хатловдан ўтказиб, мажбурий соттириши ёки тугаттириши, бу зараркунанда ҳаракатга йўл қўйган ташкилотларни аёвсиз жазолаши керак бўлади. Бўлмаса, бу қийшиқ ишлар ҳеч қачон тўхтамайди (пул ўзлаштиришнинг ёпиқ ҳалқаси: бир томондан давлат компаниялари ташкил этилаверади, бир муддат ўтиб, Давактив бу компанияларни сувтекинга ёки сопини ўзидан чиқариб, “хусусийлаштириш”дан тўхтамайди).