Давлат иштирокидаги корхоналарни ташкил этишга мораторий ишлайдими? Ўтган ҳафтада қабул қилинган фармоннинг энг эътиборли ва айтиш лозимки, ғоявий жиҳати 2030 йил 1 январга қадар давлат иштирокидаги корхоналарни (мудофаа ва хавфсизлик билан боғлиқ корхоналар ҳамда Ўзбекистон Республикаси Президенти қарорларида назарда тутилган ҳоллар бундан мустасно) ташкил этишга мораторий жорий қилингани бўлди. Айтиш керакки, бу борада, яъни давлат корхоналарини урчитишни тўхтатишга аввал ҳам бир неча уринишлар бўлган. Масалан, битта товар бозорида бешта ва ундан ортиқ хусусий тадбиркорлик субъектлари фаолият юритиб келаётган соҳаларда давлат иштирокидаги хўжалик юритувчи субъектларнинг, шунингдек уларнинг аффилланган шахсларининг ва хўжалик фаолиятини амалга ошириш ваколатлари берилган давлат муассасаларининг таъсис этилишига тақиқ қўйилганига 5 йил бўлди. Лекин давлат банклари-ю, давлат компаниялари потиратиб шўъба ва "набираларни" ташкил этиб ётипти. Узоққа бормайлик, сотувга қўйилган мана шу Технопарк МЧЖ пойтахт ҳокимияти томонидан "Масъулияти чекланган ҳамда қўшимча масъулиятли жамиятлар тўғрисида"ги Қонун талабларига зид равишда ташкил этилган. Лекин маҳаллий ҳокимиятлар, Давлат ҳокимияти ва бошқарув органлари МЧЖларни тузишда давом этишда тўхтагани йўқ. Яъни, айтмоқчиманки, давлат банклари ва компаниялари, ижро ва ҳокимият органлари томонидан давлат компанияларини тузиш пул ва бюджет ўзлаштиришнинг бир каналига айланиб қолган, амалдаги қонунчилик ишлаганида ва ҳеч қурса, жазо бўлганида давлат корхоналарини тузиш бунчалик авж олмаган бўларди.