​Рублнинг мустаҳкамланган курси узоқ сақланиб қолмаслиги инобатга олиниши керак Бугун кун давомида халқаро платформаларда 1 АҚШ доллари учун таклиф этилган курс 80,5 рублгача пасайди. Халқаро пул ўтказмалари тизимлари ва банклар ҳисобларида 1 доллар учун ўртача 83 рубль нисоби олинмоқда. Йил бошидан буён рубль АҚШ долларига нисбатан ўртача 20% атрофида мустаҳкамланган. Аввалги сакрашлар ва қулашлар пайтида ҳам бўлгани сингари, волатиллиги юқори рублнинг бу сафарги кескин мустаҳкамланиши бош омили яна иқтисодий ёки фундаментал омиллар эмас. Трамп маъмуриятининг путинпараст риторикаси ва марҳамати ортидан геосиёсий кескинликнинг пасайиши кутилмалари асосий триггер ролини бажармоқда. Бошқача айтганда, бозор иштирокчиларининг хоҳишлари (оташкесим ва кейин сулҳ, санкциялар бекор қилиниши, инвесторларнинг Россияга қайтиши) аванс тариқасида аллақачон рубль курсида акс эттирилмоқда. Оптимистик хоҳишларнинг реалликка айланиши қанча муддатли жараён эканини балки бугун Трамп ва Путиннинг телефон орқали мулоқотлари кўрсатиб берар. Ҳисобга олиш керакки, 2025 йил учун Россия бюджети Urals типидаги нефть нархининг қарийб 70 долларлик котировкаси ва долларнинг 96,5 рубллик курсида ҳисоб қилинган. Рублнинг узоқ вақт мустаҳкамланган ҳолда туриши даромадлари нефть ва газга, харажатлари урушга боғланган бюджетни издан чиқаради. Шундай экан, рублнинг, эҳтимолки, яқин давр учун энг яхши курсини кўриб турипмиз. Бундан фойдаланиб қолиш керак, пул ўтказмаларидаям, экспортдаям.