Рубль қадрсизланишда лира билан беллашмоқда Июннинг охирги ҳафтасида 2023 йилнинг энг омадсиз валютаси лиранинг нисбатан барқарорлиги қайтган бўлса, рублнинг қадрсизланиши тезлашиб кетди. Ўхшамаган исённинг сўндирилишидан кейин рубль долларга нисбатан қийматини 84 атрофида сақлаб қоладигандек эди. Лекин бундай бўлиб чиқмади. Ойнинг охирида йирик солиқ тўловчиларнинг солиқ тўловлари тугаётгани ва валюта сотуви камайгани сайин рубль яна мавқеини йўқотишни бошлади. Бугун кун давомида долларнинг рублга нисоби 89дан ўтди. Охирги марта бундай курс 2022 йил 29 мартда қайд этилганди. Гарчи кўпчилик учун ёқимсиз туйилсада, долларнинг рублга нисбатан курси 90 атрофида бўлиши Россия бюджети учун жудаям комфорт коридор ҳисобланади. Фақат шу ҳолатдагина ўсиб бораётган дефицит бироз мувозанатланиши, нефть ва газ даромадларининг йўқотилиши компенсацияланиши мумкин бўлади. Такрорлаш лозимки, рублга нисбатан ўрта ва узоқ муддатли прогнозлар унинг қиймати иқтисодий омиллардан узоқлашиб бораётгани сабабли умуман маънога эга эмас.