​Ўзбекистонда минглаб мулклар аукциондан қайтарилмоқда Апрель ойининг охирида Ўзбекистон банклари типирчилаб қолишган. Муаммоли активларга оид вазият тобора оғирлашиб бораётгани етмаганидек, ундирув билан боғлиқ узун чиғириқ ва мураккаб жараёнлардан ўтиб, аукционга чиқарилган мулклар бўйича савдолар оммавий равишда тўхтатилмоқда. Ўтган ҳафтадан бошлаб қуйида кўраётганингиз важ билан минглаб мулклар савдодан қайтарилган. Хўп, 22 апрелда кучга кирган 1060- қонунда нима дейилган? Қонун билан "Суд ҳужжатлари ва бошқа органлар ҳужжатларини ижро этиш тўғрисида"ги қонуннинг 54- моддаси тўртинчи қисми қуйидагича таҳрир этилган: "...гаровга қўйилган мол-мулк суд томонидан мажбурий тарзда баҳолашдан ўтказилади ҳамда ушбу кимошди савдосидаги бошланғич реализация қилиш нархи суд қарори билан баҳолаш тўғрисидаги ҳисоботда аниқланган миқдорда белгиланади". Ушбу модданинг 22 апрелгача бўлган таҳрири: "... гаровга қўйилган мол-мулк қўшимча баҳоланмайди ҳамда тижорат банк ва қарз олувчи ўртасида тузилган гаров (ипотека) тўғрисидаги шартномада кўрсатилган нарх бўйича реализация қилинади". Афсуски, янги таҳрир 22 апрелгача аукционга чиқарилган мулкларга ҳам тадбиқ этилмоқда, яъни қонун ўтган замонга нисбатан тадбиқ этилмоқда. Марказий банк ва Адлия вазирлиги 22 апрелгача аукционга чиқарилган мулкларнинг савдодан олиниши билан боғлиқ вазиятни атрофлича ўрганиб, ҳолатга нисбатан ҳуқуқий майдонда оқилона ва амалий муносабат билдириши керак деб ўйлаймиз.