Шаҳар ўртасида ҳам табиатни севиш мумкин экан Голдерз Ҳилл паркининг сўлим, дарахтларга тўла қисмида айланиб юрганимизда, болаларим бир нарсага эътибор қаратишди. Биздан кейин келаётган, хасса суянган бир аёлни кўргач, дарахтлардаги каптарлар, ғурраклар у томон учишди. Пастроқ шохларда ўйнаб юрган икки олмахон ҳам югургилаб тушиб келиб, бор диққатини шу аёлга қаратишди. Аёл елкасидаги қора сумкасидан юмалоқ каштан ёнғоғи чиқариб, олмахонга узатди. Паҳмоқ жонивор қўлчаларини узатиб, тезда ёнғоқни олди ва дарахтга чиқиб кетди. Ғурракларнинг бири аёлнинг елкасига ўтириб олди, аёл унга муомала қилиб, кафтидан нимадир едирди. Атрофдаги каптарларга дон сочди. Бизга яқинлашганида, болаларим қизиқиб, ҳайвонлар ҳақида савол бера бошлашди. Аёлнинг кўзлари чақнаб, тушунтира кетди: “Булар менинг дўстларим,” деди у, ҳайвонларни кўрсатиб. Елкасидаги ғурракка “Вуди” деган лақаб қўйибди, олмахон жуфтлигининг ҳам лақаблари бор экан. Беш дақиқалик суҳбатда Сабине опа болаларим парк ҳақида, атрофимиздаги дарахтлар ҳақида ўрганиб олишди. Бундан ташқари, олмахонларга нима учун ерёнғоқ бериш мумкин эмаслигини, ўрдакларни қандай фарқлаш ҳақида қизиқарли мини-маърузалар тинглашди. Парк кўлида сузиб юрган сув паррандаларини биз ҳам яхшироқ таниб олдик. Паркда яна бирон соат айланган бўлсак, Сабине опани яна бир-икки марта учратдик. Хассасига суяниб, одамларга жилмайиб, саломлашиб, ҳайвонларга турли егуликлар улашиб юрди. Елкасидаги емга тўла қора сумкадан ташқари оғиргина Sony фотокамераси ҳам бор эди. Камера ҳақида сўраганимда, суратга олишни яхши кўришини, йиллар давомида боғдаги дўстлари бўлмиш жониворларнинг суратлари жамланган фотокитоби яқинда чиқишини айтиб қолди. Чиқса хабар беринг, биринчилардан бўлиб сотиб оламиз, дедик. Голдерз Ҳилл паркининг гўзалликларидан қанчалик севинган бўлсак, табиатни бу қадар севадиган, ҳайвонларнинг тилини топган шундай инсонлар борлигидан хурсанд бўлдик. Сабине опага чин юракдан ҳавас қилдим. Одамлар тонгдан оқшомгача югур-югурдан боши чиқмайдиган ҳайҳотдек шаҳарда табиат билан шундай мулоқот қура олган, уни чиндан яхши кўриб, ундан илҳом оладиган инсон бўлгани учун. #ЎзгаҲаётлар @profsherzod