Ҳеч қурса репутация ҳақида қайғуриш, узвийлик ва ОАВга очиқликни ўрганиш мумкин Газета'нинг Ўзбекистондаги PISA тадқиқотларида барча президент мактаблари иштирок этаётгани юзасидан йўллаган саволларига PISA тадқиқоти асосчиси Андреас Шляйхер икки сутка ўтмай, батафсил жавоб қайтаргани мени ҳайрон қолдирмади. Йўқ, ҳозир гап президент мактабларининг тадқиқотга қўшишни аслида Ўзбекистон томони сўрагани, вазир ("Мактабларни танлаш жараёнига вазирлик умуман аралашмайди, OECD танлаб, ўтказади") ва вазирликнинг жавоблари ("мактабларни Иқтисодий ҳамкорлик ва тараққиёт ташкилотининг махсус бўлими танлаб олган, вазирлик уларни таклиф қилмаган ва таклиф қила олмайди") уйқаш эмаслиги ҳақида ҳам эмас. Гап масала бутун Ўзбекистон таълими ҳақида кетаётганига қарамай, репутация учун қайғурилмаганликда, рақамли замонда ёлғоннинг 40 йилда эмас, 40 соатда ошкор бўлиб улгуришини ҳисобга олинмаётганида, ОАВга ва жамоатчиликка ҳисобдорлик керак эмас, деган қарашларнинг зеҳниятларда тобора мустаҳкам ўрнашиб бораётганида. Хўп, биринчи саволга аниқлик киритиб олдик. Кейинги саволга ўтайлик. PISA тадқиқотлари учун танланган мактабларда юқори натижа кўрсатиш илинжида қилинган кўзбўямачилик, сохтакорлик ва манипуляциялар ҳақида нима деймиз? Уларни ким, марсликлар ё шимолий кореяликлар келиб қилмоқдами? Ким бу жирканч ишлар устида турипти? Жавоб топиш учун яна халқаро ташкилотларга мурожаат этиш керак бўладими? Ишонинг, рост гапириш, хато ва ёлғонларни тан олиш осон ва ёқимли. Ўзгаришлар шундан кейин бошланади. 2017 йил бунга гувоҳ.