Меҳнат кодексининг 333- моддаси бу шимолдагилардан кўр-кўрона ва математикани рад этиб кўчиришнинг оқибати Бугунги учрашувда ва ўзи кодекс кучга кирган охирги 2 йилда бизнесни қақшатаётган Меҳнат кодексининг 333- моддаси (айниқса унинг иккинчи хатбошиси) ҳақида гапирилмаган гап қолмади. Форишлик тадбиркор дуо қилиб қарғамади холос. Иш берувчилар, айниқса кичик ва ўрта бизнес дод солаётган бу модда бўйича иш ҳақи кечикканда йиллик 511% миқдорида компенсация тўлашга мажбур (бу амалда банкрот қилишга етаклайди). Шонли энергетиклар келтираётган энергокулфатлар ва бошқа сабаблар туфайли ҳам иш берувчи вақти вақти билан иш ҳақини кечиктириши мумкин. Бундан ҳеч ким суғурта қилинмаган (ҳаттоки бюджет органлари ҳам). Келинг, ўша моддани ўқиймиз: "Иш берувчи иш ҳақини, таътил тўловларини, меҳнат шартномаси бекор қилингандаги тўловларни ва (ёки) ходимга тўланиши лозим бўлган бошқа тўловларни тўлаш муддатини бузган тақдирда, уларни тўлов муддатидан кейинги кундан эътиборан то ҳақиқатда ҳисоб-китоб қилинган кунни ўз ичига олган муддатгача ҳар бир кечиктирилган кун учун Ўзбекистон Республикаси Марказий банкининг ўша вақтда амалда бўлган қайта молиялаштириш ставкасидан келиб чиққан ҳолда фоизлар (пулли компенсация) билан бирга тўлаши шарт. Ходимга тўланиши лозим бўлган пулли компенсациянинг миқдори Ўзбекистон Республикаси Марказий банки қайта молиялаш ставкасининг ўн фоизи миқдорида белгиланади". Кодекснинг аввалги таҳририда бўлмаган бу норма қаердан пайдо бўлган ўзи деган савол туғилади. Ўзбек чиновниги қонунларни қаердан кўчиради? Албатта, шимолдаги севимли оғаларидан. Лекин шимолдагиларнинг Кодекси бўйича компенсация асосий ставканинг 150дан бири деб белгиланган. Унда 1/150 қисм қандай қилиб кўчирганда 1/10 бўлиб қолган? Бунинг математикасини Камбағаллик вазирлигидан сўраш керак. Ëки мазкур модда ҳаракатини вақтинча тўхтатиб, кодексга зудлик билан ўзгартириш киритиш зарур (хоҳиш бўлса бу 3 кунлик иш).